Sa Washington D.C. — Magkasamang dumalo kahapon sina Yang Jiechi, espesyal na kinatawan ni Pangulong Xi, at Kasangguni ng Estado ng Tsina, at John Forbes Kerry, espesyal na kinatawan ni Pangulong Barack Obama, at Kalihim ng Estado ng Estados Unidos, sa Espesyal na Pulong hinggil sa Pangangalaga sa Dagat sa ilalim ng balangkas ng Ika-7 Diyalogong Estratehiko at Ekonomiko ng Tsina at Amerika. Tinukoy ni Yang na dapat magkasamang magsikap ang Tsina at Amerika para maging bagong growth point ang "pangangalaga sa dagat" sa kooperasyong Sino-Amerikano.
Ipinahayag ni Yang na ang dagat ay komong lupang-tinubuan ng buong sangkatauhan. Aniya, ang paggagalugad ng yaman sa dagat, pangangalaga sa seguridad sa dagat, pangangalaga sa ekolohiya ng dagat, at pagpapasulong ng sustenableng pag-unlad ng dagat, ay nangangailangan ng matapat na kooperasyon ng iba't-ibang bansa sa daigdig. Lubos na pinahahalagahan ng Pamahalaang Tsino ang pagsasagawa ng pakikipagkooperasyong pandaigdig tungkol sa mga suliraning pandagat, dagdag pa niya.
Ipinahayag naman ni Kerry na sa kasalukuyan, ang pangangalaga sa kapaligirang ekolohikal ng dagat, at pagsasakatuparan ng sustenableng paggagalugad sa dagat, ay nahaharap sa mahigpit na hamon. Aniya, ang pagsasagawa ng Amerika at Tsina ng kooperasyong pandagat, ay nakakabuti, hindi lamang sa dalawang bansa, kundi maging sa iba't-ibang bansa sa daigdig.
Salin: Li Feng
