Misa ng Paggunita, idaraos sa makasaysayang Mt. Samat
SA darating na Sabado, magkakaroon na naman ng pilgrimage sa Mt. Samat, napapanahon sa unang Linggo ng Adviento (First Sunday of Advent).
Ayon kay Balanga Bishop Ruperto Santos, sa kanilang paglalakbay tungo sa bundok ng Samat, kanilang isasaisip ang kalagayan ng mga naging biktima ng napakalakas na bagyo tatlong linggo na ang nakalilipas.
Pagsapit ng ika-lima ng hapon, magdaraos ng Misa ng Paggunita para sa mga nasawi sa bagyo at iba pang mga biktimang mula sa siyam ng rehiyon ng bansa. Sama-sama silang hihiling sa Panginoon na bigyang lakas ang mga naulila at nangangamba.
Ang salaping malilikom sa Misa ay ipadadala sa mga nagdurusang pamilya. Una ng nagpadala ang Diocese of Balanga ng salapi sa mga biktima tulad ng Cebu (P50,000), Palo (P100,000), Talibon (Bohol) (P200,000), Tagbilaran (Bohol) (P356,000) at Caritas Manila (P200,000).
Magpapadala rin sila ng P1.433 milyon sa Capiz, San Jose (Mindoro Occidental), Naval (Biliran), Antique, Romblon, Masbate at maging sa Apostolic Vicariate of Taytay (Palawan).
Hindi na magdaraos ng taunang pagtitipon para sa Pasko ang mga pari ng Balanga at lahat ng mga ala-ala at nakatakdang gastusin ay ipadadala sa Apostolic Vicariate ng Taytay (Palawan). Kanilang "inampon" ang Apostolic Vicariate at nangangahulugang tutulungan nilang lahat ang mga mananampalataya at mga pari.
1 2 3 4 5 6 7
