Vice President Binay, nangakong tutulungan ang mga nahatulan sa Qatar
MAYROON pa namang apela kaya't mayroon pang pag-asa. Ito ang pahayag ni Vice President Jejomar C. Binay sa pangamba ng mga kamag-anak ng tatlong nahatulan dahilan sa pag-eespiya at economic sabotage sa Qatar.
Tiniyak ni G. Binay sa mga pamilya ng mga nabilanggo na tutulong at susuporta ang pamahalaang Pilipino.
Idinagdag ni G. Binay namarami pang pag-dadaanang apela kaya magtatagal pa ang usapin. Nakatutok naman ang Embahada at hindi pababayaan ang mga nahatulan.
Apat na ulit sila maaaring mag-apila at hindi nararapat mawalan ng pag-asa ang kanilang mga kamag-anak.
Magugunitang isa sa tatlo ang nahatulan ng kamatayan samantalang habang-buhay na pagkakabilanggo ang iginawad sa dalawang iba pa. Kabilang sila sa siyam ng Filipinong dinakip noong 2010. Ang anim ay pinalaya.
Nakarating na ang hatol sa appellate court. Sa oras na ibasura ang apela, dalawang ulit pa silang papayagang dumulog at umapela.
Kung tatanggihan ang kanilang apela, maaari silang dumulog sa Court of Cassation o Korte Suprema ng Qatar. Ang pagpapawalang-sala sa kanilang mga kasama ay isang senyal na may posibilidad na mapawalang-sala.
Ang pagtanggi ng Department of Foreign Affairs at National Bureau of Investigation na tumanggap sila ng mga impormasyon mula sa mga akusado ay malaking tulong sa kanilang usapin.
1 2 3 4 5 6 7
