Terminal Fee sa paliparan, isasama na sa halaga ng pamasahe
MAGSISIMULA sa unang araw ng Oktubre ng taong ito, isasama na ang International Passenger Service Charge (IPSC) na kilala sa pangalang terminal fee sa halaga ng pamasahe sa eroplano.
Ito ang ibinalita ni Manila International Airport Authority General Manager Jose Angel Honrado sa isang pahayag. Nakausap na ng MIAA ang mga kumpanya ng eroplano sa iba't ibang bahagi ng daigdig.
Makakasama sa arrangement na ito ang lahat ng mga kumpanya ng eroplano at masasaklaw ang lahat ng mga pasaherong daraan sa Maynila patungo sa ibang bahagi ng daigdig. Maipatutupad ito ng buo sa Oktubre 2015 sa pagtatapos ng bisa ng mga ticket na binili bago sumapit ang unang araw ng Oktubre 2014.
Saklaw nito ang mga booking at ticket na binili sa Pilipinas o sa ibang bansa. Hindi makakasama ang mga Overseas Filipino Workers, Muslim pilgrims at national athletes na rekomendado ng Philippine Sports Commission. Ang mga bata na wala pang dalawang taon ay hindi rin pagbabayarin ng terminal fee.
May 25% ng mga pasahero sa NAIA ang paalis na Overseas Filipino Workers o 99% ng mga exempted passengers samantalang 1% ang mga Muslim pilgrims at national athletes.
Ngayong Hunyo, lalagda ang MIAA sa isang Memorandum of Agreement sa mga kumpanya ng eroplano.
Nakakakolekta ang MIAA ng may P 8.36 milyon sa bawat araw sa international terminal fees sa bawat araw. Noong nakalipas na 2013, umabot ang kanilang koleksyon sa P 3.052 bilyon at nagkaroon ng bahaging P 1.932 bilyon.
Umabot sa 7,671,643 international departing passengers ang dumaan sa NAIA. Sa bilang na ito, may 2,054,494 ang exempted sa terminal fees.
1 2 3 4 5 6 7 8
