MOFA: Kooperasyon, komprehensibong palalawakin ng SCO

Kaugnay ng katatapos na Ika-23 Pulong ng Council of Heads of State ng Shanghai Cooperation Organization (SCO), inihayag Hulyo 5, 2023 ni Wang Wenbin, Tagapagsalita ng Ministring Panlabas ng Tsina (MOFA), na nagkaisa ang mga kalahok na panig upang matatag na isakatuparan ang layon at misyon ng SCO, malalimang tuklasin ang nakatagong lakas ng kooperasyon, at komprehensibong palawakin at palalimin ang kooperasyon para pakinabangan ng mga mamamayan ng iba’t-ibang bansa.

Idinaos Hulyo 4, 2023, ang nasabing pulong via video link, at nagtalumpati rito si Pangulong Xi Jinping ng Tsina.

Nakipag-usap din siya sa ibang mga kalahok na lider hinggil sa pag-unlad ng SCO sa hinaharap, at mga mahalagang isyung panrehiyon at pandaigdig.

Kaugnay ng mga komong palagay at natamong bunga ng pulong, sinabi ni Wang na ayon sa deklarasyon matapos ang pulong, ipinagdiinan ng mga kalahok ang paggigiit ng multilateralismo, pangangalaga sa pandaigdigang katarungan at pagkakapantay-pantay, at pagpapasulong sa bagong estruktura ng relasyong pandaigdig at komunidad ng sangkatauhan na may pinagbabahaginang kinabukasan.

Saad ni Wang, matatag na bibigyang-dagok ng iba’t-ibang panig ang terorismo, separatismo, at ekstrimismo at isasagawa ang kooperasyon sa mga larangang kinabibilangan ng pangangalaga sa seguridad ng impormasyon, paglaban sa krimen at droga, pagpigil sa pagsasandata ng kalawakan, pagpapatatag ng sistema ng di-paglagnap ng sandatang nuklear at pagpapasulong ng proseso ng pandaigdigang kontrol sa armas, disarmamento, at pagpigil sa pagkalat ng sandatang nuklear.

Sinabi pa niyang pinagtibay sa pulong ang estratehiya ng pag-unlad ng kabuhayan ng SCO hanggang 2023 para isagawa ang aktuwal na plano sa pagpapalalim ng koperasyon sa kabuhayan, pamumuhunan, kalakalan, konektibidad, inobasyon ng siyensiya at teknolohiya, enerhiya, at agrikultura sa susunod na yugto.

Iniharap din ng mga kalahok na lider ng iba’t-ibang bansa ang mga mahalagang mungkahi hinggil sa pagsasagawa ng kooperasyon sa siyensiya at teknolohiya, edukasyon, kultura, kalusugan, palakasan at turismo, dagdag pa ni Wang.

Salin: Ernest

Pulido: Rhio