Mayor ng Madrid at presidente ng CMG, nagtagpo

Nakipagtagpo Hulyo 29, 2024, si José Luis Martínez-Almeida, Mayor ng Madrid, Espanya, kay Shen Haixiong, dumadalaw na Presidente ng China Media Group (CMG).

Ipinahayag ni Shen na noong nakaraang taon, nagpalitan ng mensahe sina Pangulong Xi Jinping ng Tsina at Haring Felipe VI upang ipagdiwang ang ika-50 anibersaryo ng pagkakatatag ng relasyong diplomatiko ng dalawang bansa. Binuod ng dalawang pinuno ang mga matagumpay na karanasan ng bilateral na pagpapalitan, at itinuro ang direksyon para sa magkasamang pag-unlad sa hinaharap.

Nakahanda aniya ang CMG na makipagtulungan sa lahat ng sektor ng Espanya, para aktibong ipatupad ang mahalagang konsensus ng dalawang pinuno ng estado at itaguyod ang higit na pag-unlad ng relasyong Sino-Espanya sa susunod na 50 taon.

Sinabi naman ni Martínez-Almeida na sa ilalim ng estratehikong paggabay ng dalawang pinuno ng estado, nagiging mas malawak ang kooperasyon at pagpapalitan sa pagitan ng Madrid at iba’t ibang pangunahing syudad na gaya ng Beijing.

Aniya, idaraos ng Madrid ang FIFA World Cup sa 2030 at umaasa ang Madrid na maisasagawa ng CMG ang live coverage sa kaganapang ito.

Bukod dito, dadalaw si Martínez-Almeida sa Tsina sa susunod na taon, at inaasahan ang komprehensibong kooperasyon sa CMG sa turismo, isport at iba pang larangan.

Salin:Sarah

Pulido:Ramil