HIGIT NA GAGANDA ANG RELASYON NG PILIPINAS AT TSINA. Ito ang sinabi ni Dr. Francis Chua, dating special envoy on trade at pangulo ng Federation of Filipino-Chinese Chambers of Commerce, Inc. sa isang panayam sa kanyang tanggapan. Matagal ng magkakaibigan ang mga Tsino at Filipino, bago pa man dumating ang mga Kastila, dagdag pa ni Dr. Chua. (Melo M. Acuna)
NANINIWALA si Dr. Francis Chua, isang dating special envoy sa larangan ng kalakal na higit na magiging maganda ang relasyong namamagitan sa Tsina at Pilipinas.
Sa isang panayam, sinabi ni Dr. Chua na ngayong gabi ipagpapatuloy ang pagtatanghal ng mga alagad ng Sining mula sa Jilin sa Cultural Center of the Philippines at magkakaroon ng mga pagpapalitan ng cultural troupes sa mga susunod na araw sa pagdiriwang ng ika-40 taong anibersaryo ng pagkakatatag ng diplomatic relations ng dalawang bansa.
Niliwanag ni Dr. Chua na bagama't 40 taon pa lamang ang diplomatic relations ng dalawang bansa, matagal nang magkakaibigan ang mga Tsino at Pilipino bago pa man dumating ang mga Kastila sa bansa. Subalit kahit sa relasyon ng pamilya ay nagkakaroon ng mga 'di pagkakaunawaan, lumalamig at umiinit, depende sa panahon.
Sapagkat ang Pilipinas ay isang malayang bansa, may karapatan din ang bansang maghabol ng kanyang inaakalang pag-aari. Hindi naman darating sa pagkakataong makikidigma ang mga Pilipino sa mga Tsino sapagkat batid naman ng lahat na walang sapat na kakayahan ang Pilipinas. At hindi lamang iyon, batid ng lahat na pinahahalagahan ng mga Pilipino ang kapayapaan at pakikipag-kaibigan.
Sa Kasaysayan, walang anumang bansang sinakop ang Tsina kaya't walang anumang dapat ipangamba ang Pilipinas. Anuman ang nakikita sa mga pahayagan, pawang mga salita lamang ito at karaniwan na ito sa mga nasa larangan ng diplomasya at politika.
Kahit pa mayroong magkakataliwas na paninindigan ang mga Tsino at mga Pilipino, hindi nawawala ang pagkakaibigan sapagkat nakikita naman ang pagtutulungan sa bawat panahon ng pangangailangan.
