Panibagong ambush, naganap na naman sa Basilan, Lanao del Norte

TATLONG kawal ang nasawi sa panibagong pananambang ng mga armadong kalalakihan kaninang ika-11:30 ng umaga sa Sultan Naga Dimaporo sa Lanao del Norte.

Ang mga nasawing kawal ay mula sa 5th Infantry Battalion. Tatlong iba pa ang nasugatan. Ang mga kawal ay pinamumunuan ni Lt. Col. Bangun Gaerlan at patungo sa Malabang, Lanao del Sur ng maganap ang pananambang.

Inaalam pa kung mga kasapi sa MILF ang mga nanambang.

LIMANG manggagawa sa isang rubber plantation ang nasawi samantalang apat na iba pa ang nasugatan sa panibagong pananambang ng mga armado sa Basilan kaninang ika-5:30 ng umaga.

Ayon kay Colonel Arnulfo Marcelo Burgos, Jr., taga-pagsalita ng Armed Forces of the Philippines, nasawi sa pinangyarihan ng pananambang sina Fernando Tantalo, Buenaventura Lagamay, JojonLangisbon, Renato Aligay at Johnson Jaylor sa Sitio Vandiis, Barangay Upper Cabingbing sa Sumisip, Basilan. Ang apat na nasugatan at dinala agad sa St. Peter Hospital upang magamot.

Pinaniniwalaang mga kasapi ng Moro Islamic Liberation Front ang may kagagawan ng pananambang.

MAMADALIIN NG PAMAHALAAN ANG PAGLILITIS NG MGA AKUSADO SA MAGUINDANAO MASSACRE

TINIYAK ni Deputy Presidential Spokesperspn Atty. Abigail Valte na mamadaliin ng pamahalaan ang paglutas sa usaping may kinalaman sa Maguindanao massacre na naganap magdadalawang taon na ang nakalilipas. Magugunitang 57 katao ang nasawi sa isang masaker na may bahid politika.

Sa panayam, sinabi ni Binibining Valte na batid nilang hindi nababawasan ang sama ng loob ng mga naulila at mga kaibigan ng mga naging biktima. Inatasan na umano ni Pangulong Aquino si Kalihim Leila de Lima ng Kagawaran ng Katarungan na tiyaking wala nang magpapabalam ng pag-usad ng usapin. Naganap ang insidente sa Maguindanao noong ika-23 ng Nobyembre 2009.

Bagaman, niliwanag ni Binibining Valte na hindi nakasalalay sa Ehekutibo lamang ang kalutasan ng usapin sapagkat malaki ang papel ng Hudikatura lalo pa't nasa kamay na nila ang usapin.

Bagama't nais ni Pangulong Aquino na makausap ang mga hukom upang madali ang usapin, hindi siya kailanman papayagan ng Saligang Batas sapagkat may kalayaan ang mga nasa Ehekutibo, Hudikatura at Lehislatibo at hindi kailanman mapapasa-ilalim ng Ehekutibo ang Hudikatura at Lehislatura.