Sina Zhang Jing'an,Puno ng Kawanihan ng Impormasyon ng Tanggapan ng CPPCC, at Machelle Ramos, reporter ng Serbisyo Filipino
Humarap sa mga mamamahayag ng Radio Internasyonal ng Tsina (CRI) kaninang umaga sa Beijing ang mga opisyal ng Pulitikal na Konsultatibong Kapulungan ng mga Mamamayang Tsino o Chinese People's Political Consultative Conference (CPPCC), punong organong tagapayo ng Tsina.
Nagkaroon ang mga reporter ng pagkakataon upang lubos na maunawaan kung paano pinasusulong ng CPPCC ang sosyalismong may katangiang Tsino at ang mahalagang papel na ginagampanan ng pagsasanggunian sa pagitan ng pamahalaan, karaniwang tao at ang mga partidong nasa ilalim ng CPPCC.
Sa isyu ng korupsyon, sinabi ni Zhang Jing'an, Puno ng Kawanihan ng Impormasyon ng Tanggapan ng CPPCC, na "Mayroong tungkulin ang CPPCC sa pagmomonitor sa mga administratibong gawain ng pamahalaan at pagsasakatuparan ng mga patakaran at batas. Kaya nakikita ng CPPCC ang mga isyu tungkol sa katiwalian at ihinaharap ang mga ito sa may kinalamang departamento. Bukod dito ang mga namamahalang tauhan ng mga Departamento ng Katarungan at Hukuman ay kinakatawan naman ng CPPCC. Sa mahigit anim na libong proposal ng mga kinatawan ang malaking bahagi ay tungkol sa paglaban sa kurupsyon. At ang mga ito ay nakikita sa Internet."
Ani pa ni Zhang, ang gawain ng paglaban sa katiwalian sa Tsina ay pangunahin na isinagawa ng mga departamentong pambatas. Ang ginagawa ng CPPCC ay nagtatampok sa pagharap ng mga mungkahi tungkol sa mga hakbangin laban sa korupsyon. Halimbawa dapat mas bukas ang gawain sa paglaban sa korupsyon.
Ulat ni Machelle Ramos
