MAY mga palatuntunang tumutulong sa mga manggagawang nasa ibang bansa at sa kanilang mga pamilyang naiiwan sa Pilipinas.
Ayon kay Edmund Ruga ng Episcopal Commission on Migrants and Itinerant People, higit silang magiging epektibo kung lahat ng mga diyosesis sa buong bansa ay magkakaroon ng mga taong nakalaang tumulong sa mga manggagawang Pilipino at kanilang mga kamag-anak.
Sa palatuntunang Tapatan sa Aristocrat, sinabi ni G. Ruga na sa dinami-dami ng mga manggagawang nasa iba't ibang bansa, hindi maiiwasang magkaroon ng mga suliranin. Isang magandang mungkahi ay ang pagkakaroon ng orientation sa mga pamilya ng mga manggagawang nakatakdang umalis na bansa upang matiyak na maiipon ang salaping mula sa pinagpaguran ng kanilang ama o ina.
Maraming mga pag-aaral na ginawa sa mga OFW at nabatid na nawawala ang privacy sa pagkakaroon ng mga mobile phones. Noong mga nakalipas na dekada, nabatid na tanging mga liham at voice tapes ang nakararating sa Pilipinas at sa ibang bansa na naglalaman ng mga balita at update sa pamilyang naiwan sa Pilipinas.
May mga OFW na hindi sang-ayon sa paggamit ng mobile phones sapagkat lumalabas na pang-surveillance at pang-monitor ito ng kanilang mga kabiyak.
Sa ngayon, umaabot sa 10,455,088 ang mga Pilipinong nasa 242 iba't ibang pook. Pangalawa ang Pilipinas sa Mexico sa dami ng mga manggagawa samantalang ikatlo ang Pilipinas sa remittances. Ang India ay nakatanggap ng $69 bilyon, ang China ay $ 60 bilyon samantalang ang Pilipinas ay nakatanggap ng $ 24 bilyon noong nakalipas na taon, ayon sa pananaliksik ng International Organization for Migration.
