Sapul nang alisin ng panig militar si Mohamed Morsy bilang pangulo ng Ehipto noong ika-3 ng Hulyo, patuloy ang komprontasyon ng iba't ibang paksyon sa loob ng bansa. Hanggang sa kasalukuyan, ang mga sagupaan ay ikinamatay na ng mahigit 100 tao, at ikinasugat ng ilang libong iba pa. Noong ika-26 ng Hulyo, idinaos ng milyun-milyong Egyptian ang malawakang demonstrasyon sa maraming lunsod ng bansa.
Sa kanyang pakikipag-usap kahapon sa telepono kay Mohamed El Baradeis, Pangalawang Pangulo ng Transisyonal na Pamahalaan ng Ehipto, nagpahayag si Pangkalahatang Kalihim Ban Ki-Moon ng UN ng pagkabahala sa direksyon ng pag-unlad ng kasalukuyang prosesong transisyonal ng bansang ito. Matinding kinondena rin niya ang malaking human casualty na dulot ng pagdami ng insidente ng karahasan.
Muling nanawagan si Ban sa transisyonal na pamahalaan na gawin ang lahat ng makakaya para pairalin ang mapayapang pangangasiwa sa gitna ng mga demonstrasyon, at igarantiya ang kaligtasan ng iba't ibang paksyon at lahat ng mga mamamayang Egyptian. Hinimok din niya ang transisyonal na pamahalaan na simulan ang isang mapayapang prosesong pulitikal na tunay na kinabibilangan ng iba't ibang paksyon.
Nagpalabas naman kahapon ng pahayag ang Unyong Europeo o EU na nagsasabing dadalaw ngayong araw sa Ehipto si Catherine Ashton, High Representative for Foreign Affairs and Security Policy ng Unyong Europeo o EU, para manawagan sa iba't ibang panig na bigyang-wakas ang karahasan, at simulan ang prosesong transisyonal sa lalong madaling panahon.
salin: Vera
