Pambansang Kamao, nasa Beijing

Dinaluhan kahapon ng Fighter of the Decade at Pambansang Kamao ng Pilipinas na si Manny "Pacman" Pacquiao ang isang press conference na idinaos sa Park Hyatt Hotel, Beijing. Ito ay bilang promosyon sa nalalapit nilang laban ni Brandon "Bam Bam" Rios ng Mexico sa ika-24 ng Nobyembre sa Macao, Tsina.

Sa preskon, inimbitahan ni Pacquaio ang lahat ng mga Tsino na panoorin ang laban nila ni Rios. Pinasalamatan din niya ang mga miyembro ng media, mga organizer ng naturang laban, at lahat ng fans. Aniya, dahil sa mga fans at tagasuporta, "narito kami sa kinalalagyan namin ngayon".

Sinabi rin ni Pacquaio na ang laban niya kay Rios ay isang magandang oportunidad upang pasulungin at iangat ang boksing sa Tsina.

Nang tanungin ng Serbisyo Filipino ang kanyang prediksyon sa laban at kung magkakaroon ba ng knock-out, ipinahayag ni Pacman na magiging napakaganda at exciting ng nasabing laban: dahil aniya, ang estilo ni Rios ay toe-to-toe at siguradong magkakaroon ng matinding bakbakan sa gabi ng kanilang laban.

"Kung may pagkakataon, maaring magkaroon ng knock-out. Pero, ang importante ay mag-ensayo ng mabuti. Ang knock-out ay isang bonus lamang," dagdag pa ni Pacman.

Nilinaw din ni Pacquiao na sandaang porsiyento ang kanyang konsentrasyon sa laban at maghahanda siya nang todo para rito.

"May the best man win," ani Pacquiao kay Rios.

Nang matalakay naman ang kanyang karera sa pulitika, binigyang-diin ni Pacman na hindi siya kakandidato sa pagkapangulo sa susunod na eleksyon, at masaya siya sa kanyang puwesto bilang congressman ng probinsya ng Saranggani.

Kabilang sa undercard ng laban nina Pacman at Rios si Zou Shiming, gold medalist ng Tsina sa Olympics, na ngayon ay isa nang propesyunal na boksingero sa ilalim ng pagtuturo ni Freddie Roach.

/end//

Artikulo/Larawan: Rhio Zablan