Medyo napahupa kahapon ang kalagayang panseguridad ng Ehipto, pero naganap pa rin ang mga sagupaan sa ilang lugar.
Ayon sa gabinete ng Ehipto, ang mga sagupaang naganap kamakalawa sa iba't ibang lugar ng bansa ay ikinamatay ng 79 na katao, at ikinasugat ng 549 na iba pa. Hanggang sa kasalukuyan, umabot na sa 866 ang bilang ng mga namatay sa mga sagupaan, sapul noong ika-14 ng buwang ito. Samantala, dinakip ng panig pulisya ang 124 na mahalagang miyembro ng Muslim Brotherhood.
Sinabi naman kahapon ni Abdel Fatah al-Sisi, Ministro ng Tanggulan ng Ehipto, na ipagtatanggol ng panig militar ang kalayaan ng mga mamamayan sa pagpili ng lider ng bansa, pero hindi nila papayagan ang mga aksyong makakapinsala sa seguridad ng bansa.
Ayon naman sa pambansang telebisyon ng Ehipto, alang-alang sa kaligtasan ng mga mamamayan, kinansela ng Muslim Brotherhood ang mga demonstrasyong nakatakdang idaos kahapon sa Cairo, kabisera ng bansa.
Salin: Liu Kai
