Si Fracis Chua
Sa panayam kahapon ng Serbisyo Filipino kay Francis Chua, Chairman Emeritus ng Federation of Filipino-Chinese Chamber of Commerce and Industry Incorporated (FFCCCII) at Pangulo ng Philippines-China Trade and Investment Council, sinabi niyang dapat hindi maapektuhan ng pulitika at hidwaang panteritoryo ang negosyo at kalakalan ng Tsina at Pilipinas.
Bagamat, aminado si Chua, na bahagyang apektado ng kasalukuyang situwasyon sa South China Sea ang kalagayan ng kalakalan ng Tsina at Pilipinas, naniniwala siyang ito ay hindi magkakaroon ng malaking epekto sa pangkalahatang kalagayan ng pagnenegosyo ng dalawang panig.
Aniya pa, ang sektor ng pagnenegosyo ng Pilipinas ay naniniwala, na kailangang magpatuloy ang magandang takbo ng kalakalan ng Pilipinas at Tsina, dahil ito ang batayan ng pagpapalago ng ekonomiya, at pagsusulong ng pamumuhay ng mga mamamayan ng dalawang panig.
Dagdag ni Chua, naniniwala siyang sa pamamagitan ng malakas na relasyong pang-ekonomiya, mareresolba ang naturang problema.
Aniya, ang mga Pilipino ay mapagmahal sa kapayapaan, at saan mang sulok ng daigdig, wala nang mas lalamang pa sa mga Pilipino, pagdating sa pakikisalamuha at pagtanggap ng kaibigan. Kaya, aniya, mainam para sa Pilipinas at Tsina na panatilihin ang relasyong mapagkaibigan.
Ang pinaka-importante aniya ay magtulungan ang lahat ng panig, patibayin ang mapagkaibigang relasyon sa pamamagitan ng malakas na ekonomiya, at isulong people-to-people exchanges.
Si Chua ay dumalo sa "Ika-2 Pulong ng Philippines-China Trade and Investment Council, na ginanap kahapon sa lunsod ng Nanning, Rehiyong Awtonomo ng Lahing Zhuang ng Guangxi. Ang naturang pulong ay bahagi ng idinaraos China-ASEAN Exposition (CAExpo) at China-ASEAN Business and Investment Council (CABIS).
Maraming mangangalakal at matataas na opisyal mula sa Pilipinas at Tsina ang dumalo sa nasabing pulong: kabilang dito ay sina, Ginoong Dong Songgen, Pangalawang Tagapangulo ng Organizing Committee ng Cabis at China Council for the Promotion of International Trade; Ginoong Huang Ribo, Vice Governor ng Rehiyong Awtonomo ng Lahing Zhuang ng Guangxi; Undersecretary Ponciano C. Manalo Jr. ng Department of Trade and Industry (DTI) ng Pilipinas; Attorney Miguel Varela, Pangulo ng Philippine Chamber of Commerce and Industry (PCCI); at iba pang mga personahe mula sa sirkulo ng kalakalan.
Reporter: Rhio at Ernest
