Mga armadong MNLF sumalakay sa Basilan

MGA TAGA-BASILAN NABABAHALA.  Ito ang pahayag ni Bishop Martin S. Jumoad ng Prelatura ng Basilan ng sumiklab ang labanan sa pagitan ng mga tagasunod ni Nur Misuari ng MNLF at mga kawal ng 104th Brigade ng Philippine Army kaninang mga ika-11 ng umaga.  (File photo ni Roy Lagarde)

NANGANGAMBA ang mga taga-Lamitan City sa Basilan Province sa pag-alingawngaw ng mga sandata ng magsagupa ang mga tagasunod ni Nur Misuari at mga tauhan ng 104th Division sa ilalim ni Col. Carlito Galvez.

Ayon kay Bishop Martin Jumoad, obispo ng Prelature of Isabela de Basilan, nagsimula ang putukan kaninang ika-11 ng umaga sa Barangay Colonia, may pitong kilometro mula sa sentro ng lungsod.

Narinig ng mga taga-Isabela City ang helicopters na lumipad at pinaputukan ang mga MNLF na sumalakay. Sa pangyayaring ito, umatras ang mga armado palayo sa barangay. Subalit may balitang lumabas sa media na may dalawa katao ang sugatan samantalang may limang nawawala at pinaniniwalaang ginamit na pananggalang o hostage ng mga MNLF.

Idinagdag pa ni Bishop Jumoad na may pakikipag-ugnayan siya sa kanyang mga paring malapit sa pook ng mga sagupaan.

Sa Zamboanga City, may sunog na nagaganap sa motorpool ng Zamboanga State College of Marine Sciences at isang tahanan sa Barangay Sta. Catalina matapos magsimula ang putukan.

Sa kaugnay na balita, nagpadala na ang Embahada ng Estados Unidos ng relief supplies sa Zamboanga City.

Batay sa isang pahayag, sinabi ng Embahada ng Estados Unidos na dinala na nila kaninang ika-apat at kalahati ng hapon ang mga relief goods na binubuo ng mga kumot, tulugan, kagamitan sa palikuran, mga timba, lampin, tubig na inumin at mga de lata.

Magtatayo rin sila ng mga palikuran at tangke ng tubig sa Joaquin F. Enriquez Sports Complex.

Kasunod na naganap na pagsalakay ng mga alagad ni Nur Misuari sa ilang barangay sa Zamboanga City, nagpahayag naman ng pagkabahala ang Resident and Humanitarian Coordinator sa Pilipinas ng United Nations.

Sa isang pahayag, nanawagan ang United Nations Country Team na tapusin na ang kaguluhan at lubhang nalulungkot sa pagkasawi ng ilang walang malay na mamamayan at nananawagang ligtas na palayain ang mga napagitna sa labanan.

Pinuri ng koponan ang ginawang prayoridad ng pamahalaang pangalagaan at ipagsanggalang ang mga sibilyan.

Pinabulaanan din ng koponan ng United Nations sa Maynila na mayroon silang tauhang nagngangalang Xavier Daniel na nagpapakilalang kumakatawan sa United Nations.