Ayon sa "Kapasiyahan ng Komite Sentral ng Partido Komunista ng Tsina (CPC) sa Ilang Mahahalagang Isyu Hinggil sa Komprehensibong Pagpapalalim ng Reporma" na sinuri at pinagtibay ng Ika-3 Sesyong Plenaryo ng Ika-18 Komite Sentral ng CPC, ginawa ang pragmatikong plano sa reporma at pagbubukas sa labas, at pag-unlad ng Tsina sa darating na sampung taon. Binigyang-diin nito na ang reporma sa sistemang pangkabuhayan ay pokus ng komprehensibong pagpapalalim ng reporma.
Ipinahayag ni Wang Guogang, Puno ng Instituto ng Pananaliksik ng Pinansiya ng Chinese Academy of Social Sciences, na ang pagbibigay-diin sa di-mapag-aalinlanganang papel ng pamilihan sa pagsasaayos ng yaman ay pinakamalaking tampok at breakthrough ng naturang reporma sa larangang pangkabuhayan.
Ayon sa proklamasyon ng nasabing "Kapasiyahan," tinukoy nito na ang nukleong isyu ng reporma sa sistemang pangkabuhayan ay ang mainam na paghawak sa relasyon ng pamahalaan at pamilihan, para mapatingkad ng pamilihan ang mapagpasiyang papel sa pagsasaayos ng yaman, at mas mainam ding mapatingkad ang papel ng pamahalaan. Kaugnay nito, sinabi ni Wang na ipinakikita nito, na sa susunod na reporma, lalong bibigyang-diin ang di-mapag-aalinlanganang papel ng pamilihan sa pagsasaayos ng yaman. Dapat aniyang lubusang patingkarin ang papel ng pamilihan sa pagbuo ng presyo, at huwag gawin ng pamahalaan ang mga gawaing may-kinalaman sa pamilihan.
Tinukoy din ng proklamasyon na dapat pasulungin nang sabay ang komprehensibong pagpapaunlad at paggagalugad ng pokus, at dapat ding malawakang tiponin ang komong palagay upang mabuo ang magkakasamang puwersa sa reporma. Kaugnay nito, ipinalalagay ni Wang na sa kalakhang sistema ng bansa, puwedeng isulong muna ang reporma sa ilang larangan, ngunit kung labis na isusulong ang reporma sa sistemang pangkabuhayan, at hindi uunlad ang reporma sa mga sistema ng lipunan, kultura, pulitika, at ekolohiya, hindi maipagpapatuloy ang reporma sa sistemang pangkabuhayan. Tinukoy pa niya na kasabay ng pag-unlad ng kabuhayan at lipunan ng Tsina, bukod sa reporma sa sistemang pangkabuhayan, dapat ding isagawa ang reporma sa sistemang pulitikal, sistema ng pamamahala sa lipunan, at reporma sa sibilisasyong ekolohikal. Mas mahalaga ang komprehensibilidad ng kasalukuyang reporma kaysa nakaraan, dagdag niya.
Salin: Li Feng
