Nakipagtagpo kahapon sa Beijing si Pangulong Xi Jinping ng Tsina sa Presidente ng International Olympic Committee (IOC) na si Thomas Bach.
Binati ni Xi si Bach sa kanyang panunungkulan bilang ika-9 na presidente ng IOC.
Pinapurihan din ng pangulong Tsino ang ginagampanang papel ng IOC sa pagpapasulong ng isports, kapayapaan at kaunlaran ng daigdig.
Tinukoy rin ni Xi na maaaring pasulungin ng isports ang pag-uunawaan at pagkakaibigan ng sangkatauhan. Aniya pa, ang diwa ng Olimpiyada ng solidaridad, pagkakaibigan at kapayapaan ay nakaugat sa kaibuturan ng puso ng mga mamamayang Tsino.
Binalik-tanaw rin ni Pangulong Xi ang matagumpay na pagdaos ng Tsina ng 2008 Beijing Olympic Games at Beijing Paralympics, at 2010 Guangzhou Asian Games. Binigyang-diin niyang magsisikap pa ang Pamahalaang Tsino para mapasulong ang kalusugan ng mga mamamayan, sa pamamagitan ng isports na pangmasa at isports na kompetetibo.
Ipinahayag din ni Xi na sa kasalukuyan, maayos na isinasagawa ng Tsina ang paghahanda para sa Ika-2 Youth Olympic Games na gaganapin sa Nanjing, Probinsyang Jiangsu sa Agosto ng susunod na taon. Kasabay nito, nagsumite na ang Beijing at Zhangjiakou, lunsod sa dakong hilaga ng Tsina, ng kanilang aplikasyon para sa pagdaraos ng 2022 Winter Olympics. Umaasa aniya siyang masasamantala ng Tsina ang pagkakataong ito para ibayo pang mapasulong ang paligsahan ng Olimpiyada at isports sa taglamig.
Ipinahayag naman ni Bach ang kanyang pasasalamat sa Pamahalaang Tsino sa suporta at ambag nito sa Olimpiyada at isports ng daigdig.
Sinabi rin ni Bach na ang Tsina ay ang unang destinasyon niya sapul nang manungkulan siya bilang presidente ng IOC. Nagpakita aniya ito ng kahandaan ng IOC sa pakikipagtulungan sa panig Tsino.
Sa isang seremonya pagkaraan ng kanilang pagtagpo, ginawaran ni Bach si Pangulong Xi ng Olympic Order in Gold, pinakamataas na gantimpala ng Olimpiyada, bilang pagkilala sa ambag ni Xi sa pandaigdig na isports at Olimpiks.
Salin: Jade
