NANINIWALA si Manila Archbishop Luis Antonio G. Tagle na ang kapayakan ng unang Pasko ang nararapat pagnilayan ng mga Pilipino. Sa kanyang mensahe ngayong darating na Pasko, sinabi ni Cardinal Tagle na maraming mga Pilipino ang nag-iisip kung paano ipagdiriwang ang Pasko ng mga nakaligtas sa krisis na idinulot ng labanan sa Zamboanga noong Setyembre, sa lindol na yumanig sa Bohol at mga kalapit lalawigan noong Oktubre at sa mga apektado ni "Yolanda" noong Nobyembre.
Sa kanyang pagdalaw sa Palo, Leyte, sinabi ni Arsobispo Tagle na nakausap niya ang isang nakaligtas sa trahedya at nagsabing sa pinsalang idinulot ng bagyo, ito umano ang pagkakataong maunawaan at maipagdiriwang ang tunay na kahulugan ng Pasko.
Ani Cardinal Tagle, ang unang Pasko ay kinakitaan ng kapayakan, ng pagiging simple subalit kinatagpuan ng pagsilang sa isang sabsaban ng Anak ng Diyos tulad ng binanggit ng Propetang si Isaiah.
Ang Pasko ngayong 2013 ay isang Pasko na may pakikiisa sa mga nagtitiis. Magaganap lamang ito kung mayroong tapat na pagninilaw, pagbabalik-aral sa mga pinahahalagahan, pagsasaad ng mga prayoridad at pangangako sa Diyos, sa kapwa, bansa at nilikha namagiging mabubuting mamamayan.
Idinagdag pa niya na itinuturo ng mga nakaligtas sa sunod-sunod na trahedya kung paano makita ang Diyos ng may pag-asa.
