Bagama't idinaos kamakalawa ang halalang parliamentaryo ng Thailand, patuloy pa rin ang demonstrasyong kontra-gobyerno. Ipinalalagay ng mga tagapag-analisa na nananatiling mahirap ang pagpapahupa ng maligalig na kalagayang pulitikal ng Thailand.
Kahapon, isinapubliko ng Lupong Elektoral ng Thailand na 45.8% ang di-opisyal na voting rate ng kasalukuyang halalang parliamentaryo. Sa lahat ng mahigit 90 libong polling station sa buong bansa, mahigit 10 libo ang hindi tumakbo noong araw ng halalan, at karamihan sa mga ito ay nasa katimugan ng Thailand, kung saan malaking bahagi ng mga residente ay kontra-gobyerno. Dahil sa mababang voting rate, ipinahayag ng lupong elektoral na hindi maaring ipalabas ang resulta ng halalan. At dahil naman itinatakda ng batas ng Thailand na ang pagboto ay dapat gawin sa loob ng isang araw, mahirap ding iorganisa ang isa pang pagkakataon para muling idaos ang pagboto. Kaya, posibleng mawalan ng bisa ang naganap na halalan.
Samantala, patuloy pa rin ang demonstrasyong kontra-gobyerno sa Thailand. Sa kasalukuyan, kinukubkob ng mga demonstrador ang pansamantalang tanggapan ni Yingluck Shinawatra, Punong Ministro ng caretaker government ng Thailand. Ipinahayag ni Suthep Thuagsuban, lider ng demonstrasyon, na magpapatuloy sila hanggang magbibitiw sa tungkulin si Shinawatra. Ipinahayag naman ni Ong-art Klampaiboon, pangalawang lider ng Democrat Party, partidong oposisyon ng Thailand, na ang pagdaraos ng caretaker government ng kasalukuyang halalang parliamentaryo sa ilalim ng maigting na kalagayan ay para mapanatili ang kapangyarihan. Kaya aniya, dapat ipatalastas na walang bisa ang halalang ito.
Ipinalalagay ng mga tagapag-analisang Thai na ang kasalukuyang problema sa Thailand ay dinulot ng pagkakasalungatan sa pagitan ng mga elite at lower classes. Anila, nitong halos 20 taong nakalipas, umuunlad ng malaki ang kabuhayan at lipunan ng Thailand, pero hindi naisaayos ang mga sistema ng pulitika, edukasyon, buwis, at iba pa na angkop sa pagbabagong ito, at nagresulta ito sa nabanggit na pagkakasalungatan. Kaya sinabi nilang batay sa kasalukuyang kalagayan, mahirap pa ring pahupain ang maligalig na kalagayang pulitikal ng Thailand.
