NAIWASAN ang full-blown crisis sa mga pook na nasalanta ni "Yolanda." Ito ang pahayag ni Luiza Carvalho, ang Humanitarian Coordinator ng United Nations sa Pilipinas.
Nagkatulungan ang United Nations at ang Pamahalaan ng Pilipinas upang maibalik sa ayos ang kalagayan ng gitnang bahagi ng Pilipinas. Sa mga susunod na linggo ay magkakaroon ng pagsusuri ang mga ahensya upang mabigyang-diin ang pagpapabahay at makapagbigay ng hanapbuhay. Tatapatan ng United Nations and mga binabalak ng Pilipinas sa ilalim ng Recovery Assistance for Yolanda (RAY) na inilunsad noong Disyembre.
Inaalam pa nila ang magiging larawan ng pag-ulat na sasakop sa mga nagawa upang matugunan ang pangangailangan ng mga biktima ng bagyong Bopha, ang krisis sa Zamboanga, lindol sa Bohol at mga nagaganap sa Mindanao.
Kasama sa ulat ng United Nations ang pagkakaroon ng may 100 pamilyang apektado ng oil spill dulot ng bagyong "Yolanda." May 550 katao ang ninirahan sa isang evacuation center.
Nakabalik na ang karamihan sa mga pamilya sa pagsisimula ng paglilinis. Binigyan ang karamihan sa kanila ng shelter kits at mga tolda. Sa kasagsagan ng krisis, umabot sa 2,000 katao ang nanirahan sa evacuation center.
Noong Sabado, may 19 na pamilya ang lumipat sa bagong tayong bunkhouses sa bayan ng Concepcion. May 84 na bunkhouses ang naitayo sa bayan ay nagbabalak pang magtayo ng may 36 na iba pa.
Sa target na US$ 788 milyon, 45% pa lamang ang nalilikom hanggang kahapon.
