NAGDESISYON ang Sandiganbayan na makalabas si dating Pangulong Gloria Macapagal-Arroyo sa kanyang silid sa Veterans Memorial Medical Center upang makadalo sa lamay ng kanyang apo na nasawi sa edad na 13 buwan.
Unang nagpetisyon sa Sandiganbayan ang mga abogado ng dating pangulo na payagang mapasailalim sa house arrest sa kanyang tahanan sa Forbes Park sa Makati City si Gng. Arroyo.
Pumayag ang Sandiganbayan na makalabas ng piitan sa pagamutan upang makadalo sa lamay ng kanyang apo subalit limitado ang kanyang pananatili sa labas ng pagamutan mula ala-una ng hapon hanggang ika-sampu ng gabi mula bukas, ika-apat ng Nobyembre hanggang sa Linggo, ika-siyam ng Nobyembre.
Sa Lunes, ika-sampu ng Nobyembre, papayagan si dating Pangulong Arroyo na makalabas mula ika-siyam ng umaga hanggang ikatlo ng hapon.
Namatay ang apo ni Gng. Arroyo na si Jorge Alonzo "Jugo" Arroyo dahilan sa congenital heart disease.
Inatasan ang Philippine National Police na dalhin si Gng. Arroyo sa ganap na ika-12 ng tanghali. Ang PNP rin ang maghahatid sa kanya sa Veterans Memorial Medical Center ng hindi mahuhuli sa ganap na ika-sampu ng gabi.
Dadalhin din ng PNP si Gng. Arroyo mula sa VMMC ng sa Lunes mula ika-pito ng umaga at ihahatid sa ganap na ikatlo ng hapon matapos ang libing. Gagawin ang lamay at libing sa Forbes Park, Makati. Pangangasiwaan din ng PNP ang communication at electronic devices ni Gng. Arroyo at ibang mga panauhin sa lamay hanggang sa libing.
Hindi pahihintulutan ang anumang panayam. Si Gng. Arroyo ang magbabayad ng lahat ng gastos sa pagdadala at paghahatid sa kanya. Binigyan siya ng dalawang oras na pass kagabi upang makadalaw. Isinagawa na ang cremation kagabi.
Nasa ilalim ng hospital arrest si Gng. Arroyo sa Veterans Memorial Medical Center samantalang nahaharap ang kasong kriminal, partikular ang usaping plunder sa maling paggamit ng pondo ng Philippine Charity Sweepstakes Office.
