Idinaos kamakalawa at kahapon sa Beijing ang Ika-21 Pagsasanggunian ng mga Mataas na Opisyal ng Tsina at ASEAN. Pagkatapos ng pulong, ipinahayag sa media ng dalawang co-chairman na sina Liu Zhenmin, Pangalawang Ministrong Panlabas ng Tsina, at Noppadon Theppitak, Pangalawang Ministrong Panlabas ng Thailand, na sumang-ayon ang iba't ibang panig, na habang komprehensibo at epektibong ipinapatupad ang Declaration on the Conduct of Parties in the South China Sea (DOC), bubuuin, sa lalong madaling panahon ang Code of Conduct in the South China Sea (COC) sa pamamagitan ng pagsasanggunian.
Ipinahayag ni Liu na nagbibigay-diin ang Tsina at mga bansang ASEAN sa kahalagahan ng pagpapalakas ng diyalogo at kooperasyon sa isyu ng South China Sea. Aniya pa, sumang-ayon ang iba't ibang panig na patuloy na magsikap para ang South China Sea ay maging karagatan ng kapayapaan, pagkakaibigan, at pagtutulungan.
Sinabi naman ni Theppitak na nilinaw ng iba't ibang bansa na ang COC ay naglalayong palakasin ang pagtitiwalaan at iwasan ang pagkaganap ng mga insidente. Ito aniya ay hindi para sa paglutas ng mga hidwaan. Dagdag pa niya, hindi dapat makaapekto ang isang isyu sa komprehensibong relasyong Sino-ASEAN.
Sa pulong na ito, ipinahayag din ng Tsina ang pagkatig sa pagtatatag ng ASEAN Community, at patuloy na pagpapatingkad ng ASEAN ng namumunong papel sa rehiyonal na kooperasyon.
Salin: Liu Kai
