BAHAGYANG makakabawi ang Pilipinas kung kaunlaran ang pag-uusapan ngayong 2015 bago pa man sumigla ang ekonomiya sa 2016 sa paglago ng paggasta ng pamahalaan at mumunting pag-unlad ng exports. Ito ang pananaw ng Asian Development Bank.
Sa kanilang kalalabas na Asian Development Outlook 2015, sinabi ng bangko na ang gross domestic product growth ay matatamo sa antas na 6.0% at mas mababa ito kaysa unang pagtataya noong Marso na 6.4%. babawi ito sa 2016 sa pagkakaroon ng growth rate na 6.3% na walang pagbabago kaysa naunang pagtataya.
Sa isang press briefing, sinabi ni Richard Bolt, ang ADB country director para sa Pilipinas, matapos ang mabagal na paggalaw sa unang bahagi ng taon, magkakaroon ng dagdag na paggasta kasabay ng paglalabas ng salapi para sa darating na halalan sa Mayo ng susunod na taon, kaya't makaaangat ang ekonomiya ng bansa.
Ang mga pagbabagong ginawa upang mapasigla ang competitiveness at makatatamo ng investments ang magiging sandigan ng paglago ng ekonomiya. Makaaapekto pa rin ang patuloy na reporma at pagpasok ng investments sa infrastructure at iba pang pakikinabangan ng madla.
Naging mabigat ang karanasan ng bansa sa unang bahagi ng taon sapagkat bumagal ang sektor ng manufacturing, lumiit ang exports, walang anumang kaunlarang natamo sa sektor ng pagsasaka dahilan sa El Nino weather phenomenon na dahilan ng pagkatuyo ng mga sakahan. Lumiit pa rin ang gastos ng pamahalaan at naging dahilan ng mumunting fiscal surplus. Bumagsak din ang halaga ng piso sa dolyar ng may 4.6% noong nakalipas na linggo at ang ilan ay naglabas ng salapi sa kalakalan,
Nakikita nina G. Bolt at mga kasama sa Asian Development Bank na sa paglaki ng gastos ng pamahalaan na nagsimula sa ikalawang tatlong buwan ng taon ang nagpapasigla sa pagkakaroon ng mas magandang budget execution. Ang paggasta sa halalan ilang buwan bago sumapit ang botohan at mas malaking budget ng pamahalaan sa susunod na taon ang magsusulong ng kaunalran.
Nananatiling hamon para sa Pilipinas ang mas mabagal na pag-unlad ng ekonomiya sa malalaking industrial economies at pagbagal ng ekonomiya ng Tsina. Ang pananalasa ng El Nino ang makapipinsala sa maliliit na mga ekonomiya at retailing. Inaasahang gaganda ang exports ng Pilipinas sa susunod na taon sa higit na pagsigla ng industrial economies at ng Tsina. Ang matinding El Nino ang hahagupit sa ekonomiya ng mga kanayunan at makaaapekto rin sa pagkain, tubig at maging sa halaga ng kuryente.
