MAY panukalang batas si Congressman Harry Roque ng KABAYAN Party List na ipakulong ang mga negosyanteng isasailalim sa kontrata ang kanilang mga manggagawa.
Ani Congressman Roque, nararapat makulong ang sinumang employer na lalabag sa batas mula anim hanggang sampung taon. Magiging paglabag sa batas ang pagkuha ng mga manggagawa sa ilalim ng kontratang tatagal ng anim na buwan subalit papalitan ng bagong manggagawa na may kahalintulad na trabaho sa kumpanya.
Isang halimbawa ang salesladies na magtatrabaho ng anim na buwan samantalang mayroon ding salesladies na permanente sa trabaho, ang ganitong situwasyon ay mangangahulugan ng paglabag sa batas.
Naararapat lamang na magkaroon ng balidong dahilan sa kanilang desisyon na huwag nang baguhin pa ang kontrata. Paglabag ito sa kasalukuyang Labor Code of the Philippines, dagdag pa ng mambabatas.
Sinabi naman ni Atty. Sonny Matula, pangulo ng Federation of Free Workers na mayroon silang kaso na ginawa ng employer na kooperatiba ang mga manggagawa kaya't lumabas ang kasunduan sa pagitan ng kumpanya at kooperatiba at nagipit na ang mga kasapi ng samahan.