MAKAPAL NA ULAP NAGBABADYA NG SAMA NG PANAHON. Kung sa Albay ay mayroon ng higit sa 100,000 katao ang lumikas sa paglapit ng bagyong "Nina," makikita na ang makakapal na ulap na nagsasabing bubuhos ang malakas na ulan. Kuha ang larawan sa Sta. Cruz, Baao, Camarines Sur na saklaw ng Cyclone Signal No. 4. (Melo M. Acuna)
NAKATAAS na ang Cyclone Warning Signal No. 4 sa Catanduanes at Camarines Sur sa paglapit ng malakas na bagyong si "Nina" mula ngayong Linggo ng hapon.
Sa inilabas na ulat kaninang ala-una ng hapon, sinabi ng PAGASA na patuloy na nananatiling panganib ang sama ng panahon sa Bicol Region. Nakita ang sama ng panahon may 110 kilometro sa silangan ng Virac, Catanduanes at may lakas na 185 kilometro bawat oras at pagbugsong aabot sa 225 kilometro bawat oras at kumikilos sa direksyon na 15 kilometro bawat oras.
Ang mga naninirahan sa mga pook na saklaw ng Signal No. 4 ay makararanas ng hanging mula 171 hanggang 220 kilometro bawat oras sa susunod na 12 oras. Magkakaroon ng banayad hanggang na matinding pinsala sa mga gusali at malubhang pinsala sa mga pananim. Magkakaroon din ng banayad hanggang sa napakalakas na ulan sa lawak ng bagyong umaabot sa 500 kilometro.
Posibleng magkaroon ng daluyong na mula dalawa hanggang tatlong metro sa silangang bahagi ng Albay, Sorsogon, Camarines Sur, Camarines Norte at Catanduanes.
Nakataas ang Signal No. 3 sa Burias Island sa Masbate, sa Albay, Camarines Norte, Southern Quezon, Sorsogon at Marinduque. Magkakaroon din na maliit hanggang sa malaking pinsala sa mga gusali at pananaim sa susunod na 18 oras.
Nakataas naman ang Signal No. 2 sa Metro Manila, Masbate, kasama na ang Ticao Island, Oriental Mindoro, Batangas, Laguna, Quezon Province, kasama na ang Polillo, Romblon, Cavite, Rizal, Bulacan at Northern Samar.
Nakataas naman ang Signal Numbner 1 sa Pangasinan, Nueva Ecija, Aurora, Quirino, Nueva Vizacaya, Zambales, Pampanga, Tarlac, Occidental Mindoro kasama na ang Luban island, Calamian Group of Islands, Bataan, Aklan, Capiz, Samar, Eastern Samar, Biliran, Leyte at Bantayan Island sa Cebu.
