PABOR SA PILIPINAS ANG UMUUNLAD NA TSINA. Ikinatuwa ni Finance Secretary Carlos Dominguez III ang 6.9% growth sa GDP ng Tsina sa unang tatlong bun ng 2017. Maraming mabibili ang Tsina sa Pilipinas, dagdag pa ni G. Dominguez. (Melo M. Acuna)
SINABI ni Finance Secretary Carlos Dominguez III na ang mga balitang umabot sa 6.9% ang kaunlaran sa Gross Domestic Product ng Tsina sa unang tatlong buwan ng taon ay makabubuti sa Pilipinas.
Sa isang dagliang panayam bago nagsimula ang paglulunsad ng Dutertenomics Forum sa Conrad Hotel, sinabi ni G. Dominguez na mangangahulugan ito ng mas maraming bibilhin ang Tsina sa Pilipinas tulad ng mga integrated micro-circuits.
Napakaganda nito para sa Pilipinas, dagdag ni G. Dominguez.
Pagpapatunay lamang ito na tama ang desisyon ni Pangulong Duterte na baguhin ang prayoridad sa ekonomiya at ituon ang pansin sa Asia.
Idinagdag pa ni G. Dominguez na mula ngayong buwan hanggang sa darating na Setyembre ay inaasahan niya ang pagpasok ng US$ 75 milyon mula sa Tsina para sa dalawang tulay na ipinagkakaloob sa Pilipinas.
Lumabas na rin sa Chinese media na lalahok si Pangulong Duterte sa gaganaping "Belt and Road Summit" na nakatakdang gawin sa buwan ng Mayo sa Tsina.
