Liaoning, buong-sikap na nagpapasigla ng real economy

Nitong Lunes, Pebrero 11, unang araw ng trabaho pagkatapos ng pitong araw na bakasyon ng Spring Festival o Chinese New Year, isang pulong ang idinaos ng pamahalaang probinsyal ng Liaoning hinggil sa ibayo pang pagpapasigla ng real economy para mapabuti ang pamumuhay ng mga mamamayan ng lokalidad.

Ang Liaoning, probinsya sa dakong hilagang-silangan ng Tsina ay dating baseng industriyal ng Tsina na nagtatampok sa real economy. Upang mapasigla ang dating baseng industriyal, sa kanyang paglahok sa diskusyon ng mga delegado ng Liaoning sa taunang sesyon ng Pambansang Kongresong Bayan o NPC, punong lehislatura ng Tsina noong Marso, 2017, hiniling ni Pangulong Xi Jinping ng Tsina na pasulungin ang repormang pang-estruktura sa supply-side, palalimin ang reporma ng mga bahay-kalakal na ari ng estado at pataasin ang kakayahan ng mga tagapangasiwa ng mga bahay-kalakal.

Sinabi ni Xu Qiang, Direktor sa Seguridad na Panteknolohiya at Pangangalaga sa Kapaligiran ng Shenyang Blower Works Group Corporation, isa sa mga bahay-kalakal na ari ng estado na nakabase sa Liaoning, na nitong dalawang taong nakalipas, upang ipatupad ang kahilingan ni Pangulong Xi, inilunsad ng probinsya ang mga hakbangin at patakaran para pataasin ang kakayahan ng mga manggagawa at mapasulong ang inobasyon.

Si Xu Qiang

Sinabi naman ni Yi Hongli, Pangalawang Direktor sa Pangangasiwang Pansiyensiya't Panteknolohiya ng naturang korporasyon, na bunga ng mga patakaran at laang-gugulin sa inobasyon, nakaalpas ang kompanya sa pagkalugi, sa pamamagitan ng paggawa ng mga high-end na kasangkapan.

Si Yi Hongli

Ang Northeast Pharmaceutical Group Co., Ltd. ay isang kompanyang ari ng estado na may mahigit 70 taong kasaysayan. Noong unang tatlong kuwarter ng taong 2018, lumampas sa 5.6 bilyong yuan RMB ang kita ng kompanya na mas mataas ng 34% kumpara sa gayunding panahon ng tinalikdang taon. Baligtad ito sa matagal na pagkalugi ng kompanya.

Paliwanag ni Wei Haijun, Presidente ng nasabing kompanya, ang pag-unlad ay bunga ng reporma sa shareholding ng kompanya, kung saan pinasok ang puhunang pribado at puhunan ng mga manggagawa.

Si Wei Haijun

Para naman sa buong Liaoning, noong 2018, umabot sa 2.53 trilyong yuan RMB ang Gross Domestic Product (GDP) ng lalawigan, na mas mataas ng 5.7% kumpara sa taong 2017.

Salin: Jade
Pulido: Rhio