Ipinaratang kamakailan ng Britanikong media na ang mga dayuhang bihag sa Qingpu Prison sa Shanghai ay sapilitan umano'y pinapagawa ng Christmas card. Kaugnay nito, kinapanayam nitong Martes, Disyembre 24, 2019 ng China Global Television Network (CGTN) si Li Qiang, Alkayde ng Qingpu Prison. "Walang batayan ang nasabing ulat," mariin niyang ipinahayag.
Sinabi ni Li na layon ng repormasyon ng mga bihag na sanayin sila sa karunungan at teknolohiya, para magkaloob ng ginhawa sa kanilang hanap-buhay pagkaraang lumabas sa bilangguan. Dagdag niya, kusang-loob ang pagtatrabaho ng mga bihag sa bilangguan, at ang larangan kung saan sila nagtatrabaho ay sarili nilang pinili.
Ayon kay Li, may takdang kita ang mga bihag na nais magtrabaho. Ang bahagi ng mga kita ay ginagamit para sa pagbili ng pang-araw-araw na kagamitan sa bilangguan, at pagtawag o pagpapadala ng liham sa kani-kanilang kapamilya. Samantala, ang nalalabing bahagi ay maaaring kunin ng mga bilanggo kapag nakalaya na sa bilangguan, para sa simula ng bagong pamumuhay, dagdag niya. Si Peter Humphrey na binanggit sa ulat ng Britanikong media ay tumanggap ng parusa sa Qingpu Prison mula noong 2013 hanggang 2015, saad ni Li.
Salin: Vera
