Xi Jinping sa komunidad ng daigdig: igiit ang pagsuporta sa multilateralismo at pagtalima sa mga pangako sa UN Charter

Hinimok ni Pangulong Xi Jinping ng Tsina ang komunidad ng daigdig, na igiit ang pagsuporta sa multilateralismo at pagtalima sa mga pangako sa Charter ng United Nations (UN).

Winika ito ni Xi, sa kanyang pakikipagtagpo sa pamamagitan ng video link, kay Pangkalahatang Kalihim Antonio Guterres ng UN, Miyerkules, ika-23 ng Setyembre 2020, sa Beijing.

Tinukoy din ni Xi, na kumakalat pa rin ang Coronavirus Disease 2019 (COVID-19), at nakahanda ang Tsina, na patuloy na ipagkaloob ang suporta at tulong sa mga bansang may pangangailangan para sa paglaban sa pandemiya, at patuloy na katigan ang mga sistema ng UN sa pamumuno ng pandaigdig na kooperasyon sa aspektong ito.

Inulit ni Xi, na pagkaraang matagumpay na ma-idebelop ng Tsina ang bakuna laban sa COVID-19, ito ay magiging "global public good," at magkakaroon ng abot-kayang presyo, lalung-lalo na para sa mga umuunlad na bansa.

Sinabi ni Xi, na lumitaw ang maraming bagong problema sa panahon ng pandemiya, at hindi hiwalay ang mga ito sa isyu ng kapayapaan at kaunlaran.

Aniya, dapat patingkarin ng UN Security Council (UNSC) at mga pirmihang kasaping bansa nito ang papel ng mekanismo ng kolektibong seguridad.

Ang pagsasagawa ng unilateralismo at hegemonismo ay salungat sa mithiin ng mga sangkatuahan, diin niya.

Dagdag ni Xi, sa harap ng pandemiya ng COVID-19, nakikita rin ang mga depekto ng pandaigdigang sistema ng pamamahala, kaya naman dapat isaalang-alang ng iba't ibang panig kung paano ito pabubutihin.

Pero, hindi nararapat bumuo ng panibagong sistemang kapalit nito, saad niya.

Binigyang-diin niyang, iisa lamang ang sistema sa daigdig, at ito ang pandaigdigang sistema kung saan ang sentro ay UN.

Aniya pa, iisa lamang din ang set ng mga tuntunin, at ito ay mga saligang norma ng relasyong pandaigdig batay sa UN Charter.

Sinabi rin ni Xi, na gusto lamang ng Tsina, na magkaroon ng mas maligayang pamumuhay ang mga mamamayan nito, at magbigay ng mas malaking ambag para sa buong sangkatauhan.

Samantala, hindi magkikibit-balikat ang Tsina habang sinisira ng iba ang soberanya, dignidad ng nasyonalidad, at puwang na pangkaunlaran nito, dagdag ni Xi.

Nanawagan siya sa lahat ng mga bansa, na isa-isang-tabi ang mga pagkakaiba sa bansa, nasyonalidad, kultura, at ideolohiya, para pasulungin ang pagtatatag ng komunidad ng pinagbabahaginang kinabukasan para sa sangkatauhan.

Sinabi naman ni Guterres, na kinakaharap ngayon ng daigdig ang mga krisis at hamong gaya ng pandemiya ng COVID-19, pagbabago ng klima, at iba pa.

Lalo pa aniyang kinakailangan ang multilateralismo, pandaigdig na kooperasyon, at mas malakas na UN.

Pinasalamatan din niya ang palagiang pagsuporta ng Tsina sa multilateralismo at UN.

Salin: Liu Kai