The Great Wall and Stars ni Harrold Villaflor
Isang Pilipino nanaman ang nanalo sa Beijing in the Eyes of Foreign Friends.
Taon-taon idinadaos ang photo contest na ito at sa limang taon nang pagdaraos ng kontest mula 2009, palaging may mga Pilipino na nananalo dito. Noong 2009 Third Prize ang nakuha nila Red Ognita para sa litratong "Blues" at si John RaymondTiam naman para sa entry na "Great Wall." 2010 Second Prize ulit si Daher Ognita o si Red Ognita para sa larawang "Taiji." At noong 2011 Third Prize si John Raymond Tiam para sa isinumiteng larawang "Spring Summer Autumn Winter"
Sa taong 2012 Second Prize ang "Sunset" ni Alex de Dios samantalang Third Prize si John Raymond Tiam para sa kuhang "Kunming Lake in Winter. "
Nitong 2013 magandang balita ang pagkakapanalo ng litratong "The Great Wall and Stars" ng Second Prize. Ang photographer nito ay walang iba kundi si Harrold Villaflor.
Isang architect at kasalukuyang nagtatrabaho si Harrold Villaflor sa Shanghai. Pero bago nadistino sa ibang lunsod, sa mga nalalabing araw ng pamamalagi sa Beijing isang espesyal na photowalk ang isinagawa ng Pilipino Overseas Photographers Beijing o POP Beijing para sa kanya.
Great Wall ang napili ng grupo para sa shoot at ang lugar na ito ang pagmumulan din ng winning photo ni Villaflor sa 2013 Beijing in the Eyes of Foreign Friend photo contest.
Isang magandang libangan ang photography at maraming mga Filipino expats at overseas workers ang kinilala na sa ibat ibang mga photo competitions sa Tsina. Bukod sa Beijing, may ilang mga kababayan na rin ang nanalo sa mga paligsahan sa Guangzhou. Patunay ito sa likas na pagkamalikhain at tunay na husay sa sining ng mga Pinoy.
Alamin ang kwento sa likod ng litrato ni Harrold Villaflor. Pakinggan ang buong interbyu ni Machelle Ramos sa programang Mga Pinoy Sa Tsina. Gumamit ng internet browser na may pinakabagong bersyon ng Flash Player at siguruhing gumagana ang audio plug-in sa website na ito.
1 2
