Mga Pinoy sa Bahrain, Pinag-iingat

Dahilan sa umiinit na situasyon sa Bahrain, itinaas ng Department of Foreign Affairs ang Alert Level sa Alert Level 2 na nangangahulugan ng "restriction of movement."

Ayon kay Foreign Undersecretary Rafael E. Seguis, nanawagan sila sa mga Filipino na nasa Bahrain na huwag na munang maglalabas ng bahay at kung maari'y umalis na muna sa bansa.

Idinagdag pa ng opisyal na bagama't umaasa silang maaayos ang situasyon sa mayamang bansa, kailangan ang precautionary measures upang matiyak ang kaligtasan ng mga manggagawang Pinoy doon.

Samantalang wala pang dahilan upang itaas ang Alert Level sa bilang ikatlo na nangangahulugan ng "voluntary repatriation," gagawin ng Department of Foreign Affairs ang paghahanda para sa mga kaukulang pasilidad. Unang naglabas ng travel advisory ang Pilipinas noong a-beinte uno ng Pebrero na huwag na munang maglakbay patungo sa Bahrain. Ang mga bansang United Kingdom, Australia at New Zealand ay naglabas din ng ganitong advisory.

Kinakausap na ng mga tauhan ng Embahada ng Pilipinas ang mga samahan ng mga Pilipino doon upang talakayin ang "contingency measures" na kinakailangan.

Si Ambassador Corazon Yap-Bahjin ay nanawagan sa mga mamamayang manatiling kalmado at maging mapagbantay sa mga nagaganap sa kanilang kapaligiran.

Samantala, sinabi ni Fr. Edwin Corros ng Episcopal Commission on the Pastoral Care for Migrants and Itinerant People na wala pa silang anumang mensaheng natatanggap mula sa kanilang mga chaplain na nakatalaga sa iba't ibang bansa na may kakaibang situasyon.

Mula sa CBCP Media Office, ito si Melo M. Acuna, nag-uulat para sa China Radio International-Filipino Section.