Sa paanyaya ni Pangulong Hu Jintao ng Tsina, mula ngayong araw hanggang ika-3 ng susunod na buwan, dadalaw sa Tsina si Pangulong Benigno Simeon C. Aquino III ng Pilipinas. Nitong isang taong nakalipas sapul nang manungkulan si Aquino bilang pangulo, ito ang kaniyang kauna-unahang pagdalaw sa Tsina. Ipinalalagay ng mga tagapag-analisa na ang paghahanap ng kooperasyong pangkabuhayan at pangkalakalan ay magiging pokus ng gagawing biyahe ng Pangulong Pilipino sa Tsina.
Nitong ilang taong nakalipas, nananatiling mainam ang tunguhin ng pag-unlad ng relasyong Sino-Pilipino, kabilang dito, ang pagpapalitang pangkabuhayan at pangkalakalan ng dalawang bansa ay nagiging pangunahing bahagi ng kanilang kooperasyon. Ipinalalagay ng mga tagapag-analisa na ang layon ng pagdalaw ni Aquino sa Tsina ay pasulungin ang ganitong kooperasyon at ibayo pang patatagin ang pundasyon ng pag-unlad ng relasyon ng dalawang bansa.
Ang delegasyong Pilipino sa Tsina ay binubuo ng halos 200 katao at halos kalahati sa mga ito ay mga personahe na galing sa sirkulong komersyal ng Pilipinas. Sa panahon ng pagdalaw sa Tsina, bukod sa pakikipag-usap sa mga lider Tsino, dadalo rin si Aquino sa tatlong porum ng mga mangangalakal na Tsino at Pilipino, at ito ay napakadalang makita sa panahon ng pagdalaw ng lider ng isang bansa sa ibang bansa.
Nitong 10 taong nakalipas, natamo ng relasyong pangkabuhayan at pangkalakalan ng Tsina at Pilipinas ang napakalaking pag-unlad. Sa kasalukuyan, ang Tsina ay nagsisilbing ika-3 pinakamalaking trade partner ng Pilipinas, at ang Pilipinas naman ay nagsisilbing ika-6 na pinakamalaking trade partner ng Tsina sa 10 bansang ASEAN.
Ipinahayag ni Qu Xing, Puno ng Instituto ng Pananaliksik sa Isyung Pandaigdig ng Tsina, na kumpara sa populasyon at saklaw ng pamilihan ng mga bansang Tsina at Pilipinas, maliit pa ang saklaw ng kalakalan at pamumuhunan sa pagitan ng dalawang bansa. Ipinalalagay pa niyang may napakalaking potensiyal ang kooperasyong pangkabuhayan at pangkalakalan ng dalawang bansa.
Salin: Li Feng
