Mga Pilipino sa Gitnang Silangan ang nangunguna sa @Pontifex
MALUGOD na ibinalita ni Msgr. Paul Tighe, ang Kalihim ng Pontifical Council on Social Communications na laking gulat nila ng suriin ang pinakamaraming followers ng Santo Papa sa Roma na noo'y si Pope Benedict XVI at hinalinhan ni Pope Francis.
Sa panayam ng CBCP Online Radio, sinabi ni Msgr. Tighe, isang paring tubo sa Dublin, Ireland, na malaki ang magagawa ng social communications sa mga pamilyang magkakalayo dahilan sa hanapbuhay. Sa pamamagitan ng social media ay madali nang makausap ang isang anak o magulang o asawa ng isang nangibang-bansa.
Ipinaliwanag ni Msgr. Tighe na 'di tulad noong mga nakalipas na dekada, pawang sulat, telegrama at overseas calls ang napakikinabangan ng mga nangingibang-bansa, mas mura na ang komunikasyon sa pamamagitan ng smart phones.
Sa kanilang karanasan sa Vatican, ikinagulat nilang mabatid ang maraming followers ng @Pontifex na nagmula sa Gitnang Silangan. Matapos nilang suriin ang kanilang datos ay nabatid nilang ang mga ito ay pawang mga Pilipino na nakikipagpalitan ng pananaw, nagtatanong at nagpaparating ng kanilang paniniwala sa mahahalagang isyu na inilalabas ng Santo Papa.
Nanawagan siya sa mga Pilipino na patuloy na makiisa sa paggamit ng social communications upang mai-angat ang kaalaman at pananampalataya.
Na sa Pilipinas si Msgr. Tighe upang magsalita sa Second Catholic Social Media Summit na magmumula sa Sabado, ika-23 ng Nobyembre sa Colegio de San Juan de Letran na itinataguyod ng CBCP Media Office at iba pang mga tanggapan sa loob ng Catholic Bishops Conference of the Philippines. Magtatapos ang pagtitipon sa darating na Linggo, ika-24 ng Nobyembre.
1 2 3 4 5 6 7
