Pahayag ng National Democratic Front, pinabulaanan
WALANG katotohanan ng nabalitang pagtanggi ng pamahalaang dalawin nina Randall Echanis at Rafael Baylosis ng National Democratic Front sina Wilma at Benito Tiamzon sa PNP Custodial Center.
Ayon sa tanggapan ni Kaliim Teresita Quintos-Deles ng Office of the Presidential Adviser on the Peace Process, niliwanag ng PNP duty officer noong ika-13 ng Abril, Linggo, na kailangang magkaroon ng isang linggong palugit upang maproseso ang mga kaihilingang dumalaw. Dala nina G. Echanis at Baylosis ang letter request mula sa grupong SELDA noong araw ding iyon. Sinabihan umano ng pulisya na hindi mapagbibigyan ang kanilang kahilingan at kailangang magkaroon ng bagong takdang petsa ng pagdalaw.
Prayoridad ang ibinibigay sa mga pinakamalapit na kamag-anak, mga abogado, mga manggagamot at ang mga hindi kabilang sa talaang ito ay papasailalim sa karaniwang proseso na mangangailangan ng application na kailangang isumite ilang araw bago ang takdang pagdalaw.
Nagdadalawang-isip na umano ang OPAPP na magpadala ng endorsement sa PNP sa kahilingan ng NDF sa pamamagitan ni Issa Dumanjug Palo ng Monitoring Committee for Human Rights Secretariat na magkaroon ng bagong petsa sa pagdalaw.
Pangulo ng CBCP, nanawagan
SINABI ni Arsobispo Socrates B. Villegas, pangulo ng Catholic Bishops Conference of the Philippines na maraming mga Pilipino ang nagugumon sa pag-inom ng alak at sobrang pagkain upang makatugon sa stress.
Sa isang pahayag, sinabi ni Arsobispo Villegas na mas makabubuting magkaroon ng bagong istilo ng pamumuhay na ang diin ay sa magandang kalusugan at mas magandang pananaw sa buhay.
Sa kanyang Easter Pastoral Introduction on the Stewardship of Health, sinabi niya na ang pagkain at paginom na nararapat lamang "in moderation" at kailangan din ang pag-eehersisyo.
Ilan sa mga nangungunang dahilan ng kamatayan sa Pilipinas ay sakit sa puso, diabetes at cancer na lumulubha sa walang humpay na pagkain at pag-inom. Ang pagkakaroon ng magandang kalusugan ay mahalaga lalo't may sapat na pahinga at pagdidiyeta.
1 2 3
