Manggagamot, narses at iba pang volunteers, nakakalat; stampede, pinangangambahan
NANGANGAMBA ang mga manggagamot at mga dalubhasa sa posibilidad ng stampede kung hindi mapipigil ang mga mamamayang nagnanais na makalapit sa Santo Papa. Kasabay ito ng pagpapakalat ng may 500 mga manggagamot mula sa Kagawaran ng Kalusugan at may 2,000 mga tauhan ng Philippine Red Cross ang itatalaga sa mga pupuntahan ni Pope Francis ngayong linggong ito.
Sinabi ni Dr. Lyndon Lee Suy, tagapagsalita ng Department of Health na may koordinasyon na ang kanilang tanggapan sa mga pagamutan na posibleng pagdalhan ng mga isusugod na pasyente lalo't may malalapit na pagamutan sa Quirino Grandstand, Mall of Asia, UST at maging sa Tacloban City at Palo, Leyte.
Ipinaliwanag ni Dr. Ted Herbosa, dating Health Undersecretary, na handa ang Philippine General Hospital na tumanggap ng mga pasyenteng dadalhin ng mga ambulansya at tauhan ng Kagawaran ng Kalusugan at Philippine Red Cross.
Matapos suriin ng frontliners ng Kagawaran ng Kalusugan at ng Philippine Red Cross, dadalhin ang mga pasyente sa pagamutan kung kakailanganin. Idinagdag ni Dr. Herbosa na tulad ng mga nasugatan noong nakalipas na Pista ng Quiapo, nilinis lamang ang mga galos at sugat at inayudahan ang mga tumaas ang presyon at mga hindi makahinga. Isinugod ang isang lalaki sa Manila Doctors Hospital matapos maipit sa kasgasagan ng prusisyon subalit hindi na nakarating ng buhay.
Ayon kay Bernabe "Benjo" Bacani ng Philippine Red Cross, may sapat na dugo ang kanilang tanggapan sa anumang magiging pangangailangan.
1 2 3 4
