|
||||||||
|
||
EUROPEAN AMBASSADOR AT MGA SAMAHANG PANGDAIGDIG, TUMUTULONG SA PILIPINAS. Sinabi ni European Union Ambassador Guy Ledoux (kanan) na tumutulong ang kanilang tanggapan sa mga biktima ni Yolanda. Kasama niya sa larawan si David Sevcik, pinuno ng ECHO, isang tanggapan ng European Union na may kinalaman sa pagtugon sa mga pangangailangan ng mga mamamayan. (Melo M. Acuna)
POSIBLENG UMABOT PA NG APAT NA TAON ANG KANILANG PAGTULONG. Niliwanag ni Amb. Guy Ledoux na magpapatuloy ang kanilang pagtulong sa livelihood programs ng mga biktima ni Yolanda. Baka umano tumagal pa ito ng hanggang apat na taon. (Melo M. Acuna)
TINIYAK ni European Union Ambassador Guy Ledoux na magpapatuloy pa silang tumulong sa mga nasalanta ni "Yolanda" sa Silangang Kabisayaan at mga kalapit pook.
Sa kanyang talumpati sa palatuntunang idinaos sa Asian Institute of Management kaninang umaga, sinabi ni Amb. Ledoux na marami nang nagawa upang tulungan ang mga biktima. Ang tulong ng kanilang tanggapan ay sa pamamagitan ng international NGOs at mga ahensya ng United Nations tulad ng Food and Agriculture Organization.
Handang tumulong ang European Union sa mga susunod na buwan at maaaring umabot ng apat na taon at pagtutuunan ng pansin ang mga usaping may kinalaman sa kalusugan. Kailangan din umanong mapalakas ang kakayahang tumugon ng mga mamamayan sa anumang trahedya at pagsubok. Kasabay nito, binigyang-diin ni Ambassador Ledoux na kailangang magsagawa ng mga pagmamapa upang mabatid ang mga mapapanganib na pook.
Sa ginawang exclusive interview kay Ambassador Ledoux, sinabi niyang nakapamahagi na sila ng 25,000 shelter kits, nakapagbakuna ng higit sa 100,000 mga kabataan at may babakunahan pang 600,000 mga bata. Ikinatuwa niya ang impormasyong handa ng umani ang mga magsasaka sa Tacloban dahilan sa pagtutulungan ng mga ahensya upang matulungan ang magsasaka.
| ||||
© China Radio International.CRI. All Rights Reserved. 16A Shijingshan Road, Beijing, China. 100040 |