Ang Shadow Puppetry o kilala rin sa tawag na Shadow Show ay isang tardisyonal na palabas sa Tsina at di-maihihiwalay na bahagi ng pamanang kultural ng Tsina sa mundo. Ito ay sinaunang paraan ng pagkukuwento at paglilibang gamit ang mga ginupit na papel na inilalagay sa likod ng inilawang telon upang ang mga ito ay mabigyang-buhay sa entablado.
Ang Shadow Puppetry ay nagsimula noong Han Dynasty (206BC hanggang 220AD), nang ang asawa ni Emperor Wu ay namatay dahil sa sakit. Lubhang nalungkot ang emperador at inutusan ang lahat ng mga pantas sa buong kaharian na muling bigyang-buhay ang kanyang reyna. Mula sa balat ng donkey, hinubog ng mga opisyal at pantas ang anyo ng reyna at sinuotan ng makukulay na damit. Muli nila itong binigyang-buhay sa pamamagitan ng pagpapagalaw ng anino nito sa likod ng telon gamit ang lampara.
Mula noon, ipinanganak ang Shadow Puppetry. Noong Ming Dynasty mayroong 40 hanggang 50 shadow show troupes sa Beijing. Noong 13th century, ito ay regular na libangan sa barracks ng mga sundalong Mongolian. Nang sakupin nila ang Persia, Arabia, at Turkey, pinalaganap nila ito sa mga lugar na ito. Pagkatapos, lumaganap din ito sa Timog Silangang Asya.
Pero, sa kasalukuyan, unti-unti na itong naglalaho sa Tsina, dahil na rin sa mga pag-unlad sa pamumuhay at teknolohiya. Parami nang paraming mga Tsino ang nahihilig sa panonood ng makabagong pelikula, teledramna, musika, pagsunod sa uso mula sa Europa at Amerika, at marami pang iba. Dahil dito, paunti nang paunti ang pagtatanghal ng mga puppeteers. Pero, magkagayunman, may isang dayuhang mula sa Timog Aprika ang tumutulong na muling buhayin ang sining na ito?
Nang kumatok sa kanyang pinto ang pagkakataon, agad nagpunta sa Tsina si Pamela Murray at iniwan ang Cape Town, South Africa. Sinamantala niya ang pagkakataon upang sundin ang kanyang hilig sa pag-aaral ng shadow puppetry. Tunghayan po natin ang kanyang kuwento.
