Konsiyerto, ASEAN style

Kumusta po ang selebrasyon natin ng Bagong Taon? Sana'y naging maluwalhati at masagana ang media noche natin, at sana, walang nadisgrasya sa paputok. Dito po sa Beijing, naging maayos naman ang pagdiriwang ng Bagong Taon. Mayroon din siyempreng paputok at mga party all over the city. At, speaking of party, isang konsiyerto， Association of South East Asian Nations (ASEAN) style ang idinaos sa Beijing, nito lang bago Mag-Pasko't Bagong Taon. Ito ay ang China-ASEAN Friendship Concert. Ipinerform po rito ng mga singer mula sa 10 bansa ng ASEAN at Tsina ang kani-kanilang mga kantang nagpapakita ng kagawian, aspirasyon at kultura ng kanilang mga mamamayan. Bilang Philippine participant, kinanta ng 17 taong gulang na si Aldrich Lloyd Talonding ang "Anak" ni Freddie Aguilar.

Dumalo at pinanood ito ng mga embahador at diplomata mula sa 10 bansang ASEAN, mga opisyal ng Tsina, media ng ASEAN at Tsina, mga kaibigan at marami pang iba.

Ipinagmalaki ni Embahador Erlinda F. Basilio ng Pilipinas si Talonding bilang Philippine representative.

Ani Basilio, "napakagaling ng kanyang boses (Talonding) at napakaganda ng kanyang bersyon ng komposisyon ni Freddie Aguilar."

Ipinahayag din ni Basilio ang paghanga sa ipinakitang talento ng mga performing artists ng ASEAN at Tsina.

Aniya, makikita sa mga awit na itinanghal ang mga komong temang nasa kultura, emosyon at kagawian ng mga mamamayan ng mga bansang ASEAN at Tsina.

Kabilang sa mga mang-aawit ng ASEAN na nagtanghal sa ay sina: Sri Nazrina mula sa Brunei na umawit ng "Anak Durhaka;" Ma Chanpanha mula sa Kambodya na umawit ng "Autumn;" Bunga Citra Lestari mula Indonesya na umawit ng "True Love;" Kai Overdance mula sa Laos na umawit ng "Champa Flower;" Asmidar Ahmad mula sa Malaysia na umawit ng "Wau Bulan;" A Sai mula sa Myanmar na umawit ng "Thanakha;" Tay Kewei mula sa Singapore na umawit ng "Home;" Tanon Jumroen mula sa Thailand na umawit ng "Love Great Charm;" Ta Quang Thang mula sa Vietnam na umawit ng "Water-ferns Drift, Clouds Float."

Ang mga mang-aawit namang Tsino ay sina Wang Li na kumanta ng The Chinese Characters, Bei Bei na kumanta ng The Old Springtime, Wang Sulong na kumanta ng The Growth Ring, Yu Kewei na kumanta ng The Velvet Flower of Glory, Ma Di na kumanta ng The Nostalgia for South, Xu Yina na kumanta ng The Beauty of the Orient, Uda Мод na kumanta ng Mother in My Dream, Xiong Rulin na kumanta ng The Butterfly Kisses Huashan, at Wang Xiaomin na kumanta ng The Little Girl Under the Lamp.

Ang 2015 China-ASEAN Friendship Concert ay magkakasamang itinaguyod ng China Radio International (CRI), Administration of Press, Publication, Radio, Film and Television ng Rehiyong Awtonomo ng Lahing Zhuang ng Guangxi, Guangxi TV, Pambansang Komisyon para sa Kultura at mga Sining ng Pilipinas (NCCA), at mga media ng sampung (10) bansang ASEAN na kinabibilangan ng People's Television Network (PTV).

 Si Aldrich Talonding (sa gitna) kasama ang iba pang mga mang-aawit na ASEAN habang ipinakikilala bago ang pagtatanghal

 Sina Ambassador Erlinda Basilio (ika-4 sa kaliwa, unang hanay) at Aldrich Talonding (ika-3 sa kanan), kasama ng iba pang mga diplomata at mang-aawit mula sa Tsina at ASEAN, pagkatapos ng pagtatanghal

 Si Ambassador Erlinda Basilio habang sumusulat ng mensaheng pambati para sa 2015 China-ASEAN Friendship Concert

 Si Ambassador Erlinda Basilio habang kinakapanayam ni Rhio, reporter ng CRI Filipino Service

 Si Ambassador Erlinda Basilio, kasama ni Aldrich Talonding (ika-5 sa kaliwa), Elenita Directo (ika-4 sa kaliwa) at Elizabeth Cachin (ika-3 sa kaliwa) ng PTV, pamilya ni Talonding, at mga miyembro ng CRI Filipino Service