Koordinasyon, susi sa mas maayos na pamamalakad
KOORDINASYON, MAHALAGA SA KAUNLARAN. Ayon kay G. Vickram Cuttaree, program leader sa sustainable development ng World Bank sa Pilipinas, mahalagang mag-usap ang mga pinuno ng mga pamahalaang lokal tulad ng Metro Manila upang matiyak ang kaunlaran. Isa ang Metro Manila sa pinakamalaking lungsod sa daigdig. (Melo M. Acuna)
MARAMING hamong haharapin ang Metro Manila sa pagdagsa ng mga tao sa maunlad na bahagi ng bansa. Magugunitang aabot sa 14 na milyon ang naninirahan at nagtatrabaho sa Metro Manila at dumagsa ang mga tao upang makatipid sa kanilang pamasahe.
Ito rin ang dahilan kaya't maraming tinaguriang informal settlers na naninirahan sa mapapanganib na bahagi ng kalakhang Maynila.
Ito ang sinabi ni Vickram Cuttaree, ang program leader ng World Bank sa Pilipinas sa larangan ng sustainable development sa "The Manila Times Forum." Idinagdag pa niyang ang mga lungsod ay maituturing na competititve at kailangang kapakipanibang sa nakararami at magkaroon ng matatag na kaayusan.
Sa buong daigdig, 80% ng economic activities ang nagaganap sa mga lungsod sa pagkakaroon ng mga industriya at oportunidad na magkahanapbuhay. Kailangang madama ng mga mamamayan ang kaunlaran ng kanilang kalagayan.
Nakita rin ang papel ng pribadong sektor sa pagpapaunlad sa Bonifacio Global City sa Taguig at Iloilo Business Park sa Iloilo City at iba pang mga bahagi ng bansa. Ang Metro Manila ay isa sa pinakamabilis na umunlad sa rehiyon.
Naniniwala si Cuttaree na madaragdagan ng may 20 milyon ang naninirahan sa susunod na dalawampung taon samantalang may 120 milyon na higit sa 65% ng buong mga mamamayan ng bansa ang maninirahan sa mga lungsod.
Sapagkat maraming pamahalaang lokal sa Metro Manila, kailangang magkaroon ng koordinasyon sa mga punonglunsod upang maayos ang pagpapatakbo sa maunlad na bahagi ng bansa.
Magugunitang walang magawa ang Metro Manila Development Authority sapagkat mayroong local government code na nag-aatang ng responsibilidad sa bawat pamahalaang lokal.
Sa pananaw ni G. Cuttaree, pagkakataon ito upang mag-usap at magtulungan ang mga pamahalaang lokal para sa kinabukasan ng mga mamamayan.
1 2 3 4
