Masasarap na Putahe at Kanilang Kahulugan sa Pestibal ng Tagsibol

Kasalukuyang ipinagdiriwang ng mga Tsino sa bawat sulok ng mundo ang pagdating ng Pestibal ng Tagsibol o Bagong Taong Tsino – Taon ng Kuneho.

 

Para sa mga Tsino, ang Pestibal ng Tagsibol ay hindi lamang pestibal ng pagtitipun-tipon, kundi panahon din ng pagtaba, dahil sa panahong ito, araw-araw kaming naghahanda ng masasarap na putahe at maligayang nagsasalu-salo.

 

Pero, bakit inihahanda ang mga ito sa Pestibal ng Tagsibol? Mayroon bang nakatagong kahulugan ng mga ito?

 

Ngayong araw, ipapakita ko sa inyo ang mga putaheng inihanda ng aking pamilya at ang kahulugan ng mga ito.

 

Una ay ang malasang paa ng baboy. Naniniwala ang mga Tsino, na kapag kumain kami ng putaheng ito sa panahon ng Pestibal ng Tagsibol,  magiging mas masikap kami sa bagong taon, at magtatamo ng mas maunlad na buhay sa pamamagitan ng aming dalawang kamay at dalawang paa.

 

Ikalawa ay zongzi o sticky rice dumpling na tulad ng suman ng Pilipinas. Sa diyalekto ng Hilagang-silangang Tsina, madalas itong bigkasín bilang “zhengzi.” Ang karakter na “挣zhèng” sa wikang Tsino ay nangangahulugang “magkapera.” Kinakain namin ito sa salu-salo tuwing bisperas ng Pestibal ng Tagsibol, bilang pagpapahayag ng hangarin sa pagkakaroon ng mas malaking kita sa bagong taon.

 

Maliban dito, mayroon din kaming kaugalian na maglagay ng sinsilyo sa loob ng mga jiaozi o dumpling. Ang mga ginintuang sinsilyo ay sumisimbolo ng suwerte sa kayamanan. Sa mahigit sandaang dumpling na iniluto, apat lalagyan ng sinsilyo sa loob. Kaya kung sinuman ang makakain ng mga espesyal na dumpling, siya ay ituturing na magiging mas masuwerte sa bagong taon.

 

Bukod sa mga putahe, mayroon ding kani-kaniyang kahulugan ang mga panghimagas, prutas, at nuwés o nut sa salu-salo.

 

Pinili namin ang de-latang apricot bilang panghimagas sa salu-salo. Sa wikang Tsino, ang albarikoke o apricot ay “杏xìng,” ito ay kapareho ng bigkas ng “幸xìng” na nangangahulugang kaligayahan. Kaya, ang pagkain nito ay nagpapahiwatig ng aming kagustuhan sa pagkakaroon ng kaligayahan at matamis na buhay sa bagong taon.

 

Para naman sa prutas, inihahanda namin ang dalandan at mansanas. Tulad ng albarikoke, ang dalandan at mansanas ay mayroon ding katulad na bigkas sa wikang Tsino, na nangangahulugang tagumpay at kaligtasan.

 

Maliban diyan, bumili rin ang tatay ko ng mga nuwés ng pistachio. Dahil sa wikang Tsino, ang pistachio ay tinatawag na “开心果kaixinguo,” na may literal na kahulugang “masayang bunga,” ang pagkain nito sa bisperas ng Pestibal ng Tagsibol ay pagpapahayag ng hangarin sa pagkakaroon ng masayang pamumuhay sa bagong taon.

 

Ayon sa Tradisyunal na Kalendaryo ng Tsina, ngayong taon ay Taon ng Kuneho. Ibinahagi rin ng mga tao ang ilang litrato ng mga malikhaing putahe na may elemento ng kuneho sa social media. Ang kyut! Di ba?

 

Ang bawat putahe tuwing salu-salo sa bisperas ng Pestibal ng Tagsibol ay nagpapahayag ng pag-asa ng mga Tsino sa pagkakaroon ng mas malusog, mas masuwerte, mas masikap, mas maunlad, at mas matagumpay na bagong taon.

 

Sa inyo, anu-ano ang mga putaheng inihahanda sa Pasko’t Bagong Taon, at ano ang kahulugan ng mga ito? Paki-share po sa amin.

 

Sana’y magkaroon tayong lahat ng isang malusog, matamis at manigong bagong taon.

 

Video/Script: Kulas

Pulido: Rhio/Jade