NAGSAMA-SAMA ang mga biktima ng pang-aabuso ng mga kawal na Hapones noong Ikalawang Digmaang Pandaigdig sa harap ng Embahada ng Japan sa Roxas Blvd. kanina at nanawagan kina Pangulong Duterte at Prime Minister Abe na huwag kalilimutan ang nakaraan at humingi ng kapatawaran sa kanila.
Dumalo sa protesta ang mga biktima ng pang-aabuso na higit na sa 80 taong gulang. Kasama nila ang mga bumubuo ng Lila-Pilipina at Gabriela Party List sa protesta bago sumapit ang katanghalian.
Ayon sa matatanda kailangang humingi ng tawad ang pamahalaang Hapones at magparating ng bayad-pinsala sa mga nabubuhay pang biktima ng pang-aabuso.
ISA SA MGA "COMFORT WOMEN" NANAWAGAN. Isa sa nalalabing biktima ng pang-aabuso ng mga kawal na Hapones noong Ikalawang Digmaang Pandaigdig ang nanawagan kay Pangulong Duterte na banggitin ang kanilang karanasan kay Japanese Prime Minister Shinzo Abe na dumadalaw sa Pilipinas ngayon. Naganap ang rally sa harap ng Japanese Embassy sa Pasay City kaninang umaga.
Sa isang pahayag na inilabas, nanawagan ang Lila Pilipina sa popular na si Pangulong Duterte na huwag mabubulag sa alok na ayuda at iba pang tulong para sa pagtatanggol ng bansa at maging sa kampanya laban sa droga. Huwag na papayag magkaroon ng military exercises, magsanay ng mga pulis at kawal at magtayo ng mga base militar sa bansa upang maiwasang maulit ang mga pang-aabuso noong dekada kuwarenta.
Nangangamba rin ang Gabriela na baka makumbinse si Pangulong Duterte sa pautang na nagkakahalaga ng US$ 2.4 bilyon para sa Mindanao at magkahalong in-kind donations at pagpapahiram ng mga barko ng Japanese Coast Guard at mga eroplano nito.
Ayon kay Joms Salvador, secretary-general ng Gabriela, nararapat patotohanan ni Pangulong Duterte ang pangakong magkaroon ng independent foreign policy. Ang anumang tulong sa kampanya laban sa ilegal na droga ay makatutulong sa mga kaduda-dudang gawain ng mga alagad ng batas na sangkot sa mga pagpatay ng mga pinaghihinalaang sangkot sa krimen.
Sinalubong si Prime Minister Abe ni Pangulong Duterte sa Malacanang ilang minuto makalipas ang ikatlo ng hapon. Matapos ang paglagda sa Guest Book ng Malacanang, naganap ang pormal na pag-uusap ng magkabilang panig. Sumaksi rin ang dalawang pinuno sa paglagda sa mga kasunduan sa pagitan ng Japan at Pilipinas.
Sinimulan ang state banquet sa karangalan ng dumalaw na Japanese prime minister bago sumapit ang ika-anim ng gabi.
Nakatakda ring dumalaw sa Davao City ang panauhing mula sa Japan ngayong gabi.
