Ayon sa datos ng World Health Organization (WHO) nitong Miyerkules, Agosto 12, 2020, lumampas na sa 20 milyon ang kabuuang bilang ng mga naitalang kumpirmadong kaso ng Coronavirus Disease 2019 (COVID-19) sa buong mundo.
Samanatala, mahigit 730,000 naman ang mga pumanaw.
Nauna rito, sinabi ni Tedros Adhanom Ghebreyesus, Direktor Heneral ng WHO, na ang pandemiya ng COVID-19 ay pambihirang krisis na pangkalusugan.
Aniya, ang pandemiyang ito ay hindi lamang may kinalaman sa buhay at pamumuhay ng mga mamamayan, kundi nakakaapekto rin sa iba't ibang aspektong gaya ng lipunan, kabuhayan at pulitika.
Batay sa tunguhin ng pandemiya, posibleng hindi na makabalik sa "old normal" ang daigdig sa hinaharap.
Ayon sa pagtasa ng Emergency Committee ng WHO, ang pandemiya ng COVID-19 ay nananatili pa ring public health emergency of international concern (PHEIC).
Ipinalalagay ng nasabing komite na tatagal nang mahabang panahon ang pandemiya.
Sa aspekto ng pananaliksik at pagdedebelop ng bakuna, natamo kamakailan ng maraming bansa ang progreso.
Noong Agosto 11, inirehistro, sa kauna-unahang pagkakataon, ang bakunang gawa ng Rusya laban sa COVID-19.
Hanggang noong Agosto 10, may 28 uri ng kandidatong bakuna ang naiulat sa WHO, at ang mga ito ay sumasailalim sa clinical test.
Kabilang dito, 6 na uri ang pumasok sa phase 3 clinical trial: 3 mula sa Tsina, 1 mula sa Amerika, 1 mula sa Britanya, at 1 na magkakasamang idinebelop ng BioNTech ng Alemanya, Pfizer Pharmaceuticals Ltd. ng Amerika at iba pang organo.
Samantala, 139 na uri ng bakuna ang kasalukuyang nasa pre-clinical trial phase.
Salin: Vera
