SINABI ni G. Axel van Trotsenburg, vice president for East Asia and Pacific ng World Bank na nakausap niya si Pangulong Benigno Simeon C. Aquino III at ang kanyang economic team kanina sa kanyang kauna-unahang pagdalaw sa Pilipinas.
Sa isang press briefing sa kanilang tanggapan sa Bonifacio Global City, sinabi ni G. Trotsenburg na dumalaw din siya sa Mindanao at nakausap si MILF Chairman Al Haj Murad Ebrahim at napag-usapan ang posibleng tulong ng World Bank sa pagpapa-unlad ng nasasakupan ng mga Bangsamoro.
Tiniyak ni World Bank Vice President for East Asia and Pacific na makakaasa ang Pilipinas na higit na gaganda ang takbo ng ekonomiya sa pagpapatuloy ng mga reporma sa ilalim ni Pangulong Benigno Simeon C. Aquino III. (Mga lawarang kuha ni Melo Acuna)
Nakausap din niya si Kalihim Corazon Juliano Soliman at pinag-usapan ang conditional cash transfer.
Sinabi ni G. Trotsenburg na totoo ang datos na maraming mga Pilipinong nangibang-bansa subalit wala pang kaukulang palatuntunan na tutustusan ng World Bank sa larangan ng re-integration kung sakaling magsi-uwi ang mga Pilipino dahilan sa economic crisis sa Estados Unidos at sa Europa.
Ipinaliwanag pa niya na mahalaga ang inclusive growth sa Pilipinas sa pagpapalalim at pagmamadali ng mga reporma upang magkaroon ng mas maraming hanapbuhay at mabawasan ang kahirapan.
Ani G. Strotsenburg, may pagsasanib ang mga palatuntunan na magkaroon ng inclusive growth ng Pilipinas at dalawang pakay ng World Bank na tapusin ang kahirapan sa 2030 at isulong ang pagbabahaginan ng kaunlaran sa 40% pinakamahihirap sa bawat bansa.
1 2 3 4
