DUMALO si Manila Archbishop Luis Antonio G. Cardinal Tagle sa isang pagtitipon ng mga mamamayang kumokondena sa paglustay ng salapi ng bayan sa pamamagitan ng "pork barrel." Ito ang salaping inilalaan para sa mga senador, kongresista, mga provincial board member at mga konsehal upang magpatupad ng kani-kanilang mga proyektong hindi naman tunay na pinakikinabangan ng madla.
Sa martsang tinaguriang "Million People March" ng mga netizen, tinataya ni Chief Supt. Marcelo Garbo na umabot sa 70,000 katao ang nagtipon sa Luneta kaninang umaga hanggang ngayong hapon. Mayroon pang isang libong mga militante ang nagtungo sa Liwasang Bonifacio at nakatakdang magmartsa patungo sa Don Chino Roces Bridge sa may Malacanang.
Sa kanyang panalangin, humingi rin tawad si Cardinal Tagle sa mga pagkakasala, pagmamalabis at maraming pagkukulang.
Nanawagan siya sa Panginoong Diyos na "palambutin ang puso ng mga nagmamatigas at mabuksan ang mga matang nabubulagan." Hiniling din niyang "magwika nawa ng katotohanan ang mga dilang nauutal at maging payak nawa ang nalulong sa karangyaan."
Sa kanyang mensahe, inanyayahan niya ang madla na tingnan, dinggin at mahalin ang mga dukha at naghihirap bilang mga kapwa at kapatid.
Hinamon niya ang madla na "pakinggan ang tinig ng Diyos sa pakatao, pamilya at barkada, maging sa palengke, bangketa at bangko, sa paaralan, tanggapan at kalakalan, sa telebisyon, radyo at sine, sa mga text messages, internet at web, sa mga presinto, kampo at korte."
Idinagdag pa ni Cardinal Tagle na mapakikinggan ang tinig ng Diyos sa mga "sambahan, moske at simbahan, sa kongreso, senado at ehekutibo, sa ilog, dagat at himpapawid, sa kabundukan, kaparangan at kapatagan, at sa anumang bahagi at bansa ng mundo at patunayan sa lahat na Marangal ang Pilipino."
Idinagdag pa ng cardinal na marangal ang mga Pilipino sapagkat may takot sa Diyos, paggalang sa buhay, pagpapahalaga sa kapwa-tao, pagmamalasakit sa bayan at pag-aaruga sa kalikasan. "Kabilang umano ang mga ito sa sistema at patakarang dapat maging daan ng Kabayanihan," dagdag pa ni Cardinal Tagle.
1 2 3 4 5 6
