HINILING ni Vice President Jejomar C. Binay kay Pangulong Benigno Simeon C. Aquino III na pulungin ang National Security Council upang masuri ang kalagayan ng kapayapaan at kaayusan ng bansa at kilalanin ang mga nararapat gawin.
Ani G. Binay, sa dami ng mga nagaganap tulad ng mga nababalitang sagupaan sa Mindanao, nakikiusap siya kay Pangulong Aquino na pulungin na ang National Security Council sa pinakamadaling panahon.
Mababatid sa pulong kung ano ang mga kailangang gawin at makapaghahanda ang mga alagad ng batas at ang sandatahang lakas ng Pilipinas upang makatugon sa pangangailangan.
Kailangang maghanda at pagusapan ang nagaganap ngayon. Kailangan ding anyayahan ang mga taong nakababatid at may karanasang suriin ang national security.
Pinakalayunin na matiyak ang katatagan at maisulong ang kapayapaan sa Mindanao, dagdag pa ng pangalawang pangulo ng bansa.
Ang National Security Council ay binubuo ng pangulo, pangalawang pangulo, chief of staff ng Armed Forces of the Philippines, National Security Council director, mga kalihim ng foreign affairs, national defense, interior and local government, justice at labor and employment.
Wala pang isang buwan matapos ang sagupaan sa Mamasapano, Maguindanao, nagsagupa naman ang mga kasapi ng Moro Islamic Liberation Front at Bangsamoro Islamic Freedom Fighters noong Sabado.
May 15,000 mga naninirahan sa Kabasalan, Sultan Sabarongis, Buliok, Bago Inged, Bulol at Rajamuda sa Pikit, North Cotabato, Kalbugan at Pagalungan sa Maguindanao ang lumikas sa kanilang mga tahanan upang makaiwas sa mga ligaw na bala.
Ayon kay Lt. Col. Orlando Edralin ng 7th Infantry Battalion, nag-ugat ang sagupaan sa rido o clan war na nauwi sa madugong sagupaan ng MILF at BIFF.
1 2 3 4 5
