Task Force, binuo sa Surigao del Sur
ISANG pinagsanib na task force na pinangalanang "Tejero" ang binuo sa isang pulong sa tanggapan ni Surigao del Sur Governor Johnny T. Pimentel at dinaluhan nina Major General Oscar T. Lactao ng 4th Infantry Division at SSupt. Gregorio R. Pimentel ang deputy regional director for operations ng Police Regional Office 13 kasama na si SSupt. Narciso Verdadero, ang Surigao del Sur Provincial Police director.
Mamadaliin ng task force ang pagdakip sa mga pumaslang sa mga Lumad sa Barangay Diatagon, Lianga, Surigao del Sur.
Nagpatawag ng executive session si Governor Pimentel upang pag-usapan ang mga gagawin ng task force upang madakip si Bobby Tejero at mga kasama na may kagagawan ng pagpaslang noong unang araw ng Setyembre. May kautusan din ang gobernador na disarmahan ang iba pang mga grupo sa kanyang lalawigan.
Magmumula sa Surigao del Sur Provincial Police Office at 402nd Infantry Brigade ng Philipine Army ang mga kalahok sa task force.
Noong Lunes, ikapito sa buwan ng Setyembre, ipinagsakdal ang mga suspect na pinangunahan ni Bobby Tejero sa panununog sa isang kooperatiba at pagpaslang sa tatlo katao sa Barangay Diatagon. Kinasuhan sila ng grave coercion, multiple murder, arson, robbery at grave threats.
Ayon kay CSupt. Vert T. Chavez, regional director ng Police Regional Office 13, mahalaga ang pagbuo ng task force upang matugunan ang malagim na mga pangyayari sa Lianga.
Nangako naman si Major General Lactao na susuportahan nila ang PNO sa pagpapatupad ng batas upang madali ang pagdakip sa mga may kagagawan ng krimen. Ang kanilang pagtungo sa Lianga ay upang mamagitan sa anumang kaguluhan sa tinaguriang "tribal conflict situation."
1 2 3 4 5
