Tsina at Biyetnam, palalakasin ang relasyon at kooperasyon sa bagong taon

Sa pamumuno nina Ministrong Panlabas Wang Yi ng Tsina at Pangalawang Punong Ministro Tran Luu Quang ng Biyetnam, idinaos kahapon, Disyembre 1, 2023, sa Hanoi, Biyetnam, ang ika-15 pulong ng Steering Committee for Bilateral Cooperation ng dalawang bansa.

Binigyan ng dalawang opisyal ng mataas na pagtasa ang pag-unlad ng relasyon at kooperasyon ng Tsina at Biyetnam sa taong ito, na ika-15 anibersaryo ng pagkakatatag ng komprehensibo, estratehiko, at kooperatibong partnership ng dalawang bansa.

Ipinahayag nila ang kahandaang sa susunod na taon, panatilihin ang pag-uugnayan sa mataas na antas, palakasin ang kooperasyon sa tanggulang bansa at seguridad, palalimin ang kooperasyon sa kadena ng industriya at suplay, padaliin ang pagpapalagayang tao-sa-tao, magkasamang itaguyod ang multilateralismo, at pasulungin ang kooperasyon sa dagat.

Sinang-ayunan din nilang ibayo pang patingkarin ang papel ng Steering Committee for Bilateral Cooperation, para palakasin ang pag-uugnayan ng iba’t ibang departamento ng pamahalaan ng dalawang bansa, at ilabas ang mas maraming plano ng mga konkretong kooperasyon.

Editor: Liu Kai
Pulido: Ramil Santos