Inaprubahan kahapon sa apat na araw na Ika-3 Sesyong Plenaryo ng Ika-18 Komite Sentral ng Partido Komunista ng Tsina (CPC) ang desisyon hinggil sa mahahalagang isyung may kinalaman sa komprehensibong pagpapalalim ng reporma ng bansa.
Ayon sa nasabing desisyon, ang pamilihan ay kailangang gumanap ng di-mapag-aalinlanganan o "decisive" na papel sa pamamahagi ng mga yaman para mapalalim ang pambansang reporma.
Sinabi ni Xie Dongming, Ekonomista ng Singapore OCBC Bank na sa halip na dating pundamental na papel, ipinasiya ng Pamahalaang Tsino na bigyan ng "decisive" na papel ang pamilihan, at ito ay nagpapakita ng determinasyon ng Pamahalaang Tsino na limitahan ang pakikialam nito sa pamilihan.
Ipinahayag din ng dalawa pang ekonomista na sina Wang Tao mula sa JPMorgan Chase & Co. at Zhu Haibin mula sa UBS China ang katulad na palagay.
Salin: Jade