Sa magkahiwalay na okasyon, nakipag-usap kahapon sa Beijing si Liu Yunshan, Pirmihang Kagawad ng Pulitburo ng Komite Sentral ng Partido Komunista ng Tsina(CPC) sa kanyang conterpart mula sa Lao People's Revolutionary Party(LPRP) na si Pany Yathotu, at Tagapangulo ng Indonesian Democratic Party-Struggle(PDIP) na si Megawati Soekarnoputri.
Nang kausapin si Pany, sinabi ni Liu na nakahanda ang Tsina na magsikap, kasama ng Laos, para tupdin ang kasunduang narating ng mga kataas-taasang lider ng dalawang bansa, palalimin ang pagpapalitan at pagtutulungan sa pagitan ng mga partidong pulitikal at pamahalaan, at isakatuparan ang konektibidad ng dalawang panig sa balangkas ng estratehiyang "Silk Road Economic Belt at Silk Road sa Karagatan sa ika-21 Siglo" o "One Belt, One Road" para pasulungin ang pragmatikong pagtutulungan ng dalawang panig sa ibat-ibang larangan.
Ipinahayag naman ni Pany ang pagpahalaga sa relasyon ng CPC at LPRP, at estratehiyang "One Belt, One Road." Nananalig aniya siyang makikinabang ang Laos at mga may-kinalamang bansa mula sa estratehiyang ito, at ito rin ay makakatulong sa kapayapaan ng daigdig.
Sa pakikipag-usap kay Megawati, sinabi ni Liu na bilang estratehikong katuwang ng Tsina, ang ASEAN ay kaibigan ng Tsina sa karagatan. Aniya, nakahanda ang Tsina na magsikap, kasama ng Indonesya para palalimin ang kanilang pragmatikong pagtutulungan sa ibat-ibang larangan, na kinabibilangan ng pagpapasulong ng nasabing estratehiya. Samantala, positibo aniya ang CPC sa pagpapahigpit ng pakikipagtulungan sa PDIP sa ibat-ibang antas, para ibayo pang pasulungin ang relasyon ng dalawang partido.
Ipinahayag naman ni Megawati na bilang saksi at tagasunod sa pagpapasulong ng relasyong Sino-Indonesian, positibo siya sa tagumpay na natamo ng Tsina sa ibat-ibang larangan. Aniya, ipagpapatuloy ng kanyang partido ang pakikipagkaibigan sa Tsina, at gagawa din ito ng sariling ambag para sa pagpapasulong ng estratehiyang "One Belt at One Road."
Ang nasabing mga lider ay dumalo rin sa Asian Political Parties' Special Conference on Silk Road, na idinaos Beijing.
