INILUNSAD na ng Catholic Bishops Conference of the Philippines Episcopal Commission on Family and Life at Marriage Encounter Foundation of the Philippines ang pambansang paghahanap sa mga ulirang pamilya sa pagtatapos ng Post Synodal Conference on the Family sa Bacolod City kamakailan.
PAGHAHANAP PARA SA ULIRANG PAMILYA, INILUNSAD. Pinamunuan ni Bishop Gilbert Carcera, (kaliwa), Chairman ng CBCP Episcopal Commission on Family and Life ang paglulunsad ng patimpalak sa paghahanap ng mga ulirang pamilya sa buong bansa. Itinagaguyod ng Marriage Encounter Foundation of the Philippines sa pamumuno nina G. Robert and Tinette Aventajado (gitna at kanan sa larawan) ang patimpalak na magtatapos sa ika-31 ng Hulyo, 2016. (MEFP Photo)
Kikilalanin ng parangal ang magagandang nagawa ng mga pamilya sa pagsasabuhay ng mabuting aral at makapagbigay ng karangalan sa mga nagdarahop na nananatiling matuwid at maayos sa gitna ng kapayakan ng buhay.
Ayon kay Daet Bishop Gilbert Garcera, magkakaroon ng 87 mga pamilyang kalahok mula sa 87 mga diyosesis. Sila sa mga diyosesis ang pipili ng mga pambato ng kanilang mga nasasakupan.
Ipinaliwanag naman ng mag-asawang Robert at Tinette Aventajado na isa sa mga panuntunan ng parangal ay ang pagiging kabilang sa pinaka-mahirap sa diyosesis at aktibong nakikilahok sa mga palatuntunan ng simbahan.
Itinakda ang deadline sa darating na ika-31 ng Hulyo. Ang application forms ay matatagpuan sa mga parokya sa buong bansa. Gagawin ang parangal sa ika-23 ng Oktubre sa SMX Convention Center sa Mall of Asia sa Pasay City.
Ang mga intersadong magrekomenda ng mga ulirang pamilya ay maaaring makipag-ugnayan sa Marriage Encounter Foundation of the Philippines sa telepono number 4264206 o sa email address na mefpoutstandingfamilies@gmail.com
